भांगरभूंय | प्रतिनिधी
वर्गांत शिकयले इतलीच शिक्षकाची जापसालदारी न्हय
भांगरभूंय । प्रतिनिधी
पणजी : वर्गांत शिकोवपाचे इतलीच आतां शिक्षकाची जापसालदारी उरोवंक ना. करीयर विशीं मार्गदर्शन दिवन विद्यार्थ्यांक नोकरी वा वेवसाया विशीं समुपदेशन शिक्षकांनी करपाक जाय. दरेक शिक्षकान वर्साक 10 विद्यार्थ्यांची जापसालदारी घेवपाक जाय. हातुंतल्यान बेरोजगारीचें प्रमाण बऱ्याच प्रमाणांत उणें जातलें, अशें मुख्यमंत्री डॉ. प्रमोद सावंत हांणी सांगलें.
खांडोळां म्हाविद्यालयांत अहिल्याबाई होळकर हांचे नावान सुरू जाल्ल्या वसतीं घराचे उक्तावण जालें. ह्या वेळार मुख्यमंत्र्यांनी शिक्षकांचेर फोक काडलो. शिक्षणा खातीर शाळा, म्हाविद्यालयांनी सरकार सुविधा तयार करीत आसा. विद्यार्थ्यां खातीर बऱ्योच येवजण्यो आसा. बरेच विद्यार्थी पदवी वा पदव्युत्तर शिक्षण घेवन घरा बसता. तांका स्पर्धात्मक परीक्षा वा बँकींग परीक्षेची कसलीच म्हायती नासता. हांव विद्यार्थ्यांक दोश दी ना. तांच्या शिक्षकांक दोश दिता. यूपीएससी, बँकींग अशा तरेकवार परिक्षांची म्हायती शिक्षकांनी दिवपाक जाय. स्वयंरोजगारा विशीं ज्यो किदें येवजण्यो आसा, ताची म्हायती विद्यार्थ्यांक दिवपाक जाय. थळाव्या उद्येगीक वसणुकी कडेन संपर्क सादून म्हाविद्यालयांनी रोजगार मेळावे आयोजीत करप प्राचार्य वा शिक्षकांक शक्य आसा. शिकोवन पुराय जाले उपरांत कितल्या जाणांक नोकरी मेळ्ळी, कितले जाण स्वयं रोजगाराकडेन गेले हाचो रेकॉर्ड म्हाविद्यालयांकडे आसपाक जाय, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
