दयानंद कला केंद्र बाल भजनी सर्तींत सर्वोदय हायस्कूल पंगड पयलें इनाम

भांगरभूंय | प्रतिनिधी

भांगरभूंय । प्रतिनिधी
कुडचडेंः  दयानंद कला केंद्रान संवसारीक पर्यटन दीस कार्यावळीचो एक वांटो म्हणून आयोजीत केल्ले भुरग्यांचे भजनी सर्तींत सर्वोदय हायस्कूल पंगडात पयलें इनाम मेळयलें. दुसरें इनाम मडगांवच्या बाल भवन केंद्राक आनी तिसरें इनाम न्यू एज्युकेशनल इन्स्टिट्यूटाक फावो जालें.
सरकारान हायस्कुलांनी संगीत शिक्षक नेमल्यात. ताकां लागून भुरग्यां मदी संगीताची आवड तयार जाल्ल्या. दयानंद कला केंद्राच्या हे सर्तींत व्हडा संख्येन हायस्कूल पंगड वांटेकार जाल्ले. ताचे वयल्यान हें दिसून आयलें.
सातेरी देवळांत घेतिल्ले हे सर्तींत सर्वोदय ब पंगडाक चवथे आनी सुर्लाच्या सरकारी हायस्कूल पंगडाक पांचवे इनाम मेळ्ळें. सर्तीचें  परीक्षण  राज्य पुरस्कार फावो जाल्ल्या ज्ञानेश्वर नायक आनी भजनी कलाकार जयकुमार खांडेकार हांणी केलें. बंटी उडेलकार, मोहनदास देसाय, भिकू नायक, सदानंद खांडेकार हांणी ही सर्त येसस्वी करपाचें काम केलें. सर्तीची इनाम भेटवण कार्यावळ 27 सप्टेंबराक सांजें 5 वरांचेर  कुडचडें रवींद्र भवनांत जातली. समाज कल्याण मंत्री सुभाष फळदेसाय ह्या वेळार मुखेल सोयरे म्हणून हाजीर रावतले.