भांगरभूंय | प्रतिनिधी
मडगांवः ‘जाग’ ह्या कोंकणी नियतकालिकांत उजवाडाक आयिल्ल्या शणै गोयबाबाचेर बरयल्ल्या लेखाचेर वाद जाले उपरांत लेखक आनी उद्देजक दत्ता नायक हांणी कोंकणी भाशा मंडळाच्या प्राथमीक वांगडीपदाचो राजिनामो दिला. हाचे वांगडाच मंडळाक जाहीर केल्ल्या 1 कोटी रुपयाच्या देणग्यांतली उरिल्ली रक्कमय तांणी फाटी घेतल्या.
कोंकणी भाशा मंडळ आनी अखील भारतीय कोंकणी परिशदेन दत्ता नायक हांणी जाग नेमाळ्यांत बरयल्ल्या लेखाक अाक्षेप घेतिल्लो. नायक हांणी लेखांत केल्ल्या बरपावळीक आपलो आक्षेप आसा अशें तांणी प्रेस पत्रक जारी केल्ले. ते उपरांत आतां दत्ता नायकान राजिनामो दिवपाचें पावल उबारलां.
कोंकणी भाशा मंडळाचे अध्यक्ष सेराफीन कॉता हांकां व्हॉट्सअॅपाचेर आनी कोंकणी भाशा मंडळाच्या ईमेलाचेर राजिनामो पत्र धाडला. कोंकणी भाशा मंडळाक धाडिल्ल्या पत्रांत दत्ता नायक हांणी हे घडणुकेचेर खर नाराजगी उक्तायल्या. दोनूय संघटणांनी केल्ल्या संयुक्त प्रेस पत्रकाचेर तांणी अजाप उक्तायला. दोनूय संघटणा एकाच मनशाच्या प्रभावा खाला काम करतात असोय आरोप नायक हांणी ह्या पत्रांत केला. ह्या वादाक लागून ह्या विशयाचेर सध्या कोंकणी साहित्य मंडळांत चर्चा सुरू आसा. हाचे भायर दत्ता नायक हांणी कोंकणी भाशेचो प्रचार आनी प्रसार करपा खातीर एक कोटी रुपयांची देणगी दिवपाची घोशणा केल्ली. ह्या देणगींतली उरिल्ली रक्कमय काडून घेतात अशें नायक हांणी संघटणेक सांगलां.
कोंकणी भाशा मंडळाचे अध्यक्ष सेराफीन कॉता हांणी संपर्क केलो तेन्ना तांणी हे खबरेची म्हायती दिली. साहित्यीक आनी उद्देजक दत्ता नायक हांणी संदेश धाडून आनी मेल वरवीं संस्थेक राजिनामो धाडला. तशेंच ताणें आतां मेरेन जाहीर केल्ल्या 1 कोटी रुपयां मदीं 25 लाखां परस चड रुपया हे संस्थेक दिल्ले आसात.
पूण आतां उरिल्ली रक्कम ते दिवचे ना असो उल्लेख राजिनामो पत्रांत केला. तशेंच फुडल्या दोन दिसांत कोंकणी भाशा मंडळाचे पदाधिकारी दत्ता नायक हांची भेट घेवन ताचे कडेन चर्चा करतले अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
