भांगरभूंय | प्रतिनिधी
फोंडें : दत्तगड-बेतोडच्या इम्रान सलीम जालेकर हांची थार जीप सोमारा रातच्या सुमार २ वरांचेर उजो लागून गोबोर जाली. घरा मुखार पार्क केल्ले जिपीक उजो लागिल्ल्यान घरांतलें सामानूय लासलें. शॉर्ट सर्किटाक लागून उजो लागिल्ल्याचो अदमास उक्तायता. सुमार २० लाख रुपयांचें लुकसाण जालां.
मेळिल्ले हहयती प्रमाण, सोमारा रातीं सुमार ९.३० वरांचेर इम्रान जालेकर हांणी आपली जीप घरा मुखार पार्क केल्ली. मध्यान राती कडेन अचकीत टायर फुटिल्ल्याचो आवाज आयिल्ल्यान ह्या वाठारांतल्या लोकांक जाग आयली. तेन्ना घरांतल्या लोकांनी उदक मारून उजो पालोवपाचो यत्न केलो. पार्क केल्ले जिपीक उजो लागिल्ल्यान लागसारच्या लायटीच्या खांब्याच्यो लायटीच्यो सरयोय जळून गेल्यो. तशेंच इम्रान जालेकर हांच्या घरांतलीं विजेचेर चलपी यंत्रणांय लासून गेलीं. फोंडें उजो पालोवपी दळाच्या कर्मचार्यांनी घडणुके सुवातेर वचून उजो पालयलो. मात तो मेरेन जीप पुरायेन लासून गोबोर जाल्ली.
इम्रान जालेकर हांणी दिल्ले म्हायती प्रमाण देड वर्सां आदीं घेतिल्ले हे थार जीपींत रातचें शॉर्ट सर्कीट जाल्ल्यान उजो लागिल्ल्याचो अदमास तांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
