भांगरभूंय | प्रतिनिधी
मडगांव, प्रतिनिधी : भारतीय जनता पक्षाच्या आदेशा प्रमाण १ ऑगस्टाक दक्षीण गोंय जिल्लो पंचायत अध्यक्षपदाचो राजिनामो दितली अशी म्हायती अध्यक्ष सुवर्णा तेंडुलकार हांणी स्वता दिली. फाटलीं ३ वर्सां ७ महिन्यांच्या कळांत सुमार ५१७ कामां जाल्यांत. पक्षान बदल करपाचो निर्णय कित्याक घेतलो हें आपल्याक खबर ना, अशेंय तांणी स्पश्ट केलें.
दक्षीण गोंय जिल्लो पंचायतीच्या वेंचणुकां उपरांत सावर्डें जिल्लो पंचायत मतदारसंघाचें प्रतिनिधीत्व करपी सुवर्णा तेंडुलकार हांचे कडेन भाजप पक्षाच्या श्रेश्ठींनी अध्यक्षपद दिल्लें. जाल्यार उपाध्यक्षपद बार्सेंचे जिल्लो पंचायत वांगडी खुशाली वेळीप हांकां दिल्लें. आतां भाजपाच्या पक्ष श्रेश्ठींनी दक्षीण गोंय जिल्लो पंचायतींतले अध्यक्ष आनी उपाध्यक्ष दोनूय पदांवेल्या व्यक्तींक बदलपाचो निर्णय घेतला.
पक्षाच्या आदेशा प्रमाण १ ऑगस्टाक पंचायत संचालनालयांत राजिनामो सादर करतले. आपूण नासतली तेन्ना अध्यक्षपदार प्रभारी म्हणून उपाध्यक्ष खुशाली वेळीप कार्यरत आसतले. नव्या अध्यक्षाचे निवडी उपरांत उपाध्यक्ष खुशाली वेळीपूय पदाचो राजिनामो दितले, अशें तेंडुलकार हांणी सांगलें. ८ जानेवारी २०२१ दिसा अध्यक्षपद स्विकारिल्लें. सगळ्यांक वांगडा घेवन सत्ताधारी आनी विरोधक असो केन्नाच भेदभाव करिनासतना कामां करतालें, अशें तांणी सांगलें.
दक्षीण गोंयांत अध्यक्षपद स्विकारिल्ल्याक आतां मेरेनच्या काळांत आठ मुख्याधिकार्यांच्यो बदल्यो जाल्यो. सहाय्यक अधिकारी चार आनी सहाय्यक आनी कनिश्ठ अभियंत्यांच्योय बदल्यो जाल्यो. हांतले मुख्याधिकारी सोडून हेर सगळ्या अधिकार्यांक अतिरिक्त ताबो म्हणून दिल्लो. फकत एक कर्मचारी कायम आनी हेर कंत्राटाचेर आशिल्ले. अशा सगळ्या परिस्थितींत तीन वर्सां सात म्हयने अध्यक्षपदार काम करतना दक्षीण गोंयच्या विवीध मतदारसंघांत ५१७ कामां केल्यांत. आजूनय सुमार ३५ कामांच्यो ङ्गायली प्रक्रियेंत आशिल्ल्याचें तिणें सांगलें.
दक्षीण गोंय जिल्लो पंचायती वतीन जायत्या वर्सां उपरांत जिल्हो नियोजन समितीची बसका आयोजीत केल्ली. पंचायतींतल्यान आयिल्ल्या आराखड्या प्रमाण दक्षीण गोंय जिल्ह्याचो उदरगत आराखडो राज्य सरकाराक दिल. हातूंत सुमार २१९ कोटींच्या कामांचो आसपाव आसा. न्यायालयाच्या आदेशा प्रमाण हाचेर फुडल्योय प्रक्रिया सुरू आसात, अशें तेंडुलकार हांणी मुखार म्हणलें.
उत्तर आनी दक्षीण गोंय जिल्लो पंचायतीच्या अध्यक्षांक राजिनामो दिवपाचे आदेश भारतीय जनता पक्षाच्या वरिश्ठां कडल्यान मेळ्ळ्यात. ते प्रमाण १ ऑगस्टाक अध्यक्षपदाचो राजिनामो दितली. नव्या अध्यक्षाची नेमणूक जाले उपरांत उपाध्यक्षूय राजिनामो दितले. नवो अध्यक्ष कोण जातलो हें खबर ना. अध्यक्षपदार कोणाक नेमचो हो पक्षाचो निर्णय आसतलो, अशेंय तेंडुलकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
