भांगरभूंय | प्रतिनिधी
पणजी ः मुख्यमंत्री डॉ. प्रमोद सावंत हांणी बिरेस्तारा विधानसभा सभाघरांत दिल्ल्या आश्वासना प्रमाण दक्षीण गोंय कोमुनिदादीचे प्रशासक प्रदीप नायक हांकां दक्षता खात्यान शुक्रारा निलंबीत केले. कामा कडेन आडनदर केल्ल्यान तांकां निलंबीत केल्यात.
दक्षीण गोंय कोमुनिदाद प्रशासकां संबंदीत खूब कागाळी आयल्यात. ते कामार हजर नासतात. कामा कडेन आडनदर करतात. देखून फायल फुडें वचना. मुंगुल कोमुनिदाद जमनीचेर आशिल्लें बेकायदेशीर घर मोडपाचो आदेश आसून लेगीत त्या घराचेर कारवाय जायना अशी कागाळ नागरिकां कडल्यान येता. ते खातीर तांचे आड बेगोबेग कारवाय करची अशी मागणी आमदार व्हेंझी व्हिएगश आनी विजय सरदेसाय हांणी बिरेस्तारा लक्षवेधी सुचोवणेचेर उलयतना केली.
आमदार व्हिएगश आनी सरदेसाय हांच्या दाव्यांत सत्य आसल्यार दक्षीण गोंय कोमुनिदाद प्रशासकांचेर निलंबन कारवाय जातली अशें आश्वासना मुख्यमंत्री डॉ. सावंत हांणी सभाघरांत दिल्ले. ते प्रमाण दक्षता खात्याचे संचालक दीपक बांदेकार हांणी शुक्रारा दक्षीण गोंय कोमुनिदाद प्रशासक प्रदीप नायक कामा कडेन आडनदर करतात असो आरोप करुन तांका निलंबीत करपाचो आदेश जारी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
