भांगरभूंय | प्रतिनिधी
फोंडें, प्रतिनिधी: केंद्रांत उत्कृश्ठ कामगिरी करपी भाजप सरकाराचे हात आनीक बळिश्ठ करपा खातीर आनी नरेंद्र मोदी हांकां तिसरे फावट प्रधानमंत्री करपाक गोंयच्या भाजपाच्या दोनूय उमेदवारांक व्हडा भोवमतान जैतिवंत करपाक सगले वावुरपी कामाक लागल्यात. पक्ष श्रेश्ठींनी उमेदवारी जाहीर करपाक कळाव जरी केला तरी दक्षीण गोंयांत पल्लवी धेंपे हांकां उमेदवारी जाहीर करून पयलेच फावट बायल उमेदवाराक वेंचणुकेक देंवयल्ल्याचें आदले खासदर नरेंद्र सावयकार हांणी सांगलें.
प्रधानमंत्री नरेंद्र मोदी हांणी फाटल्या १० वर्सांनी गोंयचे उदरगती खातीर व्हड प्रमाणांत योगदान दिलां. केंद्र सरकाराच्या सहकार्यान जायते व्हडले- व्हडले प्रकल्प राज्यांत सुरु केल्यात. गोंयच्या दोनूय मतदार संघांत भाजपाच्या उमेदवारांक व्हडा मतांच्या फरकान जैतिवंत करून लोकसभेंत धाडपाक कार्यकर्त्यांनी प्रचार करपाक नेट धरला. दक्षीण गोंय मतदार संघांत खुबश्या जाणांचीं नांवां उमेदवारी खातीर धाडिल्लीं. मात भाजपाच्या पक्ष श्रेश्ठींनी विचार करूनूच पल्लवी धेंपे हांच्या नांवाक शिक्को मारिल्ल्याचें तांणी सांगलें.
प्रधानमंत्री नरेंद्र मोदी हांणी आमच्या देशाक पर्जळीत फुडाराचे दिकेन व्हेला. तांकां परत प्रधानमंत्री करपाक गोंयचे दोनूय उमेदवारांक लोकसभेंत धाडपा खातीर कार्यकर्ते नेटान कामाक लागल्यात. बेगीनूच प्राचाराक सुरवात जातली. सगळ्या मतदार संघांक भेट दिवन प्रचार करतले. दक्षीण गोंयच्यान पयलेच फावट बायल उमेदवार लोकसभा वेंचणूक लढयता. निश्चीतूच भाजपाक दोनूय सुवातांचेर व्हड येस मेळटलें असो विस्वास आदले खासदार नरेंद्र सावयकार हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
