भांगरभूंय | प्रतिनिधी
पणजी : पावस सुरू जालो काय दोंगरावेल्यान व्हांवपी घसघशे पर्यटकांक भूल घालता. खासा तरणाटीं असल्या सुवातांचेर ट्रॅकींगा खातीर तशेंच न्हांवपाक गर्दी करतात. मात अश्या वातावरणा वेळार पर्यटकांचे अती उमेदीक लागून गंभीर घडणुकोय घडटात. कुशावती जिल्ह्यांतले विवीध घसघशे, न्हंयो, तळीं आनी बंद पडिल्ल्यो चिरे खणी अश्या सुवातांचेर फाटल्या कांय दिसां सावन बुडून मरण आयिल्ल्याच्या घडणुकांनी वाड जाल्या. हेच फाटभूंयेर मनशाचे जिणेची सुरक्षा सुनिश्चीत करपा खातीर आनी अशे तरेच्यो घडणुको टाळपा खातीर दक्षीण गोंय तशेंच कुशावतीची जिल्लोधिकारी आनी जिल्लो दंडाधिकारी इग्ना क्लीटस हांणी पुराय जिल्ह्यांत फुडल्या ६० दिसां खातीर खर प्रतिबंधात्मक आदेश लागू केल्यात.
भारतीय नागरिक सुरक्षा संहिता २०२३ च्या कलम १६३ खाला जारी केल्ल्या ह्या अधिकृत आदेशा प्रमाण, जिल्ह्यांतल्या खंयच्याय उदकाच्या सुवातांचेर, जश्यो न्हंयो वा घसघशे वा खणी सारकिल्ल्या सुवातांचेर पेंवप, न्हांवप आनी उदकांत देंवपाक पुरायेन बंदी घातल्या. कुशावती जिल्लो पुलीस अधीक्षकांनी धाडिल्ल्या अहवाला उपरांत प्रशासनान हें पावल उबारलां. प्रशासनान ह्यान पयलीं खुबश्या सुवातांचेर धोक्याचे तकटे फावनय पर्यटक आनी थळावे जीव धोक्यांत घालून अनपेक्षीत खोली, उदकाचो वेगान प्रवाह आनी निसरपी वाटांकडेन आडनदर केल्ल्याचें दिसून आयलें. म्हणूनच, पुलीस आनी थळाव्या प्रशासनाक अदीक कायदेशीर अधिकार दिवपा खातीर आदेश लागू केला.
ह्या आदेशाचें स्वरूप स्पश्ट करतना प्रशासनान सांगलें, घसघश्यांच्या वाठारांत वचपाक वा भोंवपाक पुरायेन बंदी ना. बंदी आसा ती उदकांत देवपा खाती. घसघश्याचे सुवातेर डायव्हिंग करप, क्लिफ जम्पिंग करप वा उदकाच्या प्रवाहांत फोटो काडप हाचेर पुरायेन बंदी आसतली. पर्यटन आनी पर्यावरण पुरक पर्यटन चालीक लावपा खातीर फकत गोंय रान विकास महामंडळ आनी गोंय पर्यटन विकास महामंडळ हांचे वतीन अधिकृत वा प्रमाणीत केल्ल्या गायड्सच्या देखरेखी खाला ट्रॅकींग मार्ग आनी घसघश्याचेर वचपाची परवानगी आसतली. अधिकृत मार्गदर्शकां वांगडा वतना पर्यटकांक रान विभाग आनी पुलिसांचे सगले नेम खरपणान पाळचे पडटले. हो आदेश आपत्ती वेवस्थापन दळ, पुलीस, उजो पालोवपी दळ आनी कर्तव्याचेर आशिल्ल्या शासकीय कर्मचार्यांक लागू नात.
थळावे पुलीस निरीक्षक आनी मामलेदारांक आपापल्या कार्यक्षेत्रांत खर बंदोबस्त दवरपाचे निर्देश दिल्यात. जर एखादो मनीस हे नेम मोडटना दिसलो, जाल्यार ताचेर भारतीय न्याय संहिता २०२३ च्या कलम २२३ खाला गुन्यांव दाखल करतले. तशेंच संबंदीत उपविभागीय दंडाधिकार्यांक (BNS) ह्या प्रकरणी सरळ न्यायालयांत एफआयआर दाखल करपाचे अधिकार दिल्यात. सैमसूख घेतना मस्तेपणां करिनासतना स्वताचे सुरक्षीततायेची जापसालदारी घेवप हें दरेका पर्यटकाचें कर्तव्य. हाका लागून ह्या पावसांत सैमाचो आदर करात, प्रशासनाक सहकार्य करात आनी सुरक्षीत पर्यटनाची मजा घेयात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
