दक्षीण गोंयांतली वेंचणुकेची सगळी तयारी पुराय

भांगरभूंय | प्रतिनिधी

जिल्होधिकारीः वट्ट 5,95,070 मतदार, 24 घोळटे पंगड, 11 पंगडांची भौशीक सुवातेर नदर

भांगरभूंय । प्रतिनिधी

मडगांवः दक्षीण गोंयांत लोकसभा वेंचणूक मतदारसंघांत वट्ट 5 लाख 95 हजार 70 मतदार आसा. तातूंतले 3 लाख 6 हजार 818 महिला मतदार जाल्यार 2 लाख 88 हजार 243 दादले मतदार आसात. तशेंच 9 तृतीयपंथी मतदार आसात. वेंचणुकेची सगळी तयारी पुराय जाल्या. कागाळी उपरांत 30 मिण्टांत घोळटो पंगड घडणुकेचे सुवातेर पावतलो, अशें दक्षीण गोंय जिल्होधिकारी अश्वीन चंद्रू ए. हांणी सांगलें. पत्रकार परिशदेंत तांणी वेंचणुकेचे तयारीची म्हायती दिली.

ह्या वेळार दक्षीण गोंय पुलीस अधिक्षक सुनिता सावंत आनी उपजिल्होधिकारी ईश्वर हाजीर आशिल्ले.

वेंचणूक प्रक्रिये खातीर गरजेचे अधिकारी, कर्मचाऱ्यांक प्रशिक्षण दिलां. गरजेचे व्हीव्हीपॅट आनी ईव्हीएम मशिनाय उपलब्ध केल्यांत. दक्षीण गोंय मतदारसंघांत वट्ट 24 घोळटे पंगड दीसरात कार्यरत आसतले. भौशीक सुवातांचेर सर्वेक्षणा खातीर 11 पंगड आसतले. ते रेल्वे स्टेशन, विमानतळ ह्या भौशीक सुवातांचेर गाडयांची तपासणी करतले. 20 नोडल अधिकारी नेमल्यात. आयकर, पुलीस, दर्यादेग पुलीस अश्या खात्यांच्यो बसका घेतले. तशेंच विवीध राजकी पक्षांक बसका घेतना आदर्श आचारसंहिता पाळपाची सुचोवणी करतले, अशें जिल्होधिकाऱ्यान सांगलें. दक्षीण गोंयांतल्या सगळ्या 862 मतदान केंद्रांचेर उदक, वीज, शौचालय अश्यो सुविधा दितले. मंगळारा सांज मेरेन मतदान केंद्रा वयल्यो सगळ्यो सुविधा पुराय करतले. तशेंच मतदान प्रक्रियेच्या काळांत कांय कागाळी आसल्यार वेंचणूक आयोगान दिल्ल्या व्हिजील अ‍ॅपा वरवीं वा घोळट्या पंगडा कडेन कागाळ केले उपरांत 30 मिण्टांत घोळटो पंगड थंय पावतलो आनी कागाळीचेर कारवाय करतलो. 1950 राष्ट्रीय टोल फ्री नं. 1950 वा जिल्हो नियंत्रण कक्ष 2794100 ह्या नंबराचेर संपर्क सादचो. प्रसार माध्यमां आनी डिजिटल मिडियाच्या बातम्यांचेरूच लक्ष दवरतले. संवेदनशील केंद्रा विशींचो डेटा एकठांय करतात. दोन ते तीन दिसांनी म्हायती उपलब्ध जाले उपरांत त्या केंद्रांचेर चड पुलीस फौज धाडटले, अशेंय जिल्होधिकाऱ्यान स्पश्ट केलें.

बँकांतल्या वेव्हारांचेर लक्ष

वेंचणूक काळांतल्या मतदारांक हायस दाखोवपाचो प्रकार जालो जाल्यार ताचेर लक्ष दवरतात. बँका वांगडा बसका घेतल्यात. दुबावीत वेव्हारांचेर लक्ष दवरून दिसपट्टो अहवाल दिवपाक सांगलां. ह्या काळांत 50 हजारां परस अदीक रोख रकम आपल्या वांगडा बाळगिल्यार ते खातीर गरजेचीं कागदपत्रां वांगडा दवरची, ना जाल्यार ते पयशे जप्त करतले, अशें दक्षीण गोंय जिल्होधिकारी अश्वीन चंद्रू ए. हांणी म्हणलां.

अजून मतदार वळेरेंत नांव घालपाची संद

ज्या मतदारां कडेन मतदान कार्ड नात तांकां अजून फॉर्म 6 भरून दिल्यार मतदान कार्ड दिवन मतदार वळेरेंत नांव घालतले. मतदार वळेरी पुराय जाल्ली आसली तरीय नव्या मतदारांची नांवां पुरवणी जोडून तातूंत घालतले आनी तांकां मतदानाचो हक्क वापरपाक मेळटलो. चडांत चड मतदारांनी मतदाना खातीर फुडें येवचें, असो उलो जिल्हाधिकारी अश्वीन चंद्रू ए. हांणी मारला.

गरजेचो पुलीस फौजफाटो दवरतलोः पुलीस अधिक्षक

दक्षीण गोंयांत वेंचणुके खातीर पुलीस कर्मचाऱ्यांची आनी अधिकाऱ्यांची बसका घेवन प्रशिक्षण आनी सुचोवण्यो केल्यात. पुलिसां वरवीं दुबावीत हालचालींचेर नदर दवरतले. एक कंपनी सध्या उपलब्ध आसा, आनीक स कंपनी मागयल्यात. वेंचणूक काळांत लोकां कडल्यान कांय कागाळी आयल्यो नात जाल्यार लेगीत कांय प्रकरणांची स्वेच्छा दखल लेगीत घेतले, अशें पुलीस अधिक्षक सुनिता सावंत हांणी सांगलें.

ईव्हीएम कागाळींचेंर वेंचणूक आयोग घेतलो निर्णय

ईव्हीएमा आड कांय कडेन निदर्शनां आनी जनजागृती करतात. ताचेर उलयतना जिल्होधिकारी अश्वीन चंद्री ए. हांणी सांगलें, ईव्हीएम संबंदांत कांय कागाळी आसल्यार त्यो वेंचणूक आयोगा कडेन धाडून दितले. वैयक्तीक अणभवा प्रमाण ईव्हीएम पुराय सुरक्षीत आसा, अशेंय तांणी सांगलें.