भांगरभूंय | प्रतिनिधी
दोनूय अपक्षां सयत दोन भाजपा आमदारांच्या मतदारसंघांत वर्चस्व
पणजी, बातमीदार ः लोकसभा वेंचणुकेंत दक्षीण गोंयचे काँग्रेसीचे उमेदवार विरियातो फर्नांडीस जैतिवंत जावपाक साश्टीचो वांटो आसा. साश्टीच्या आठ मतदार संघातल्या सात मतदारसंघांनी विरियातो जिखले. तांतूत दोनूय अपक्ष आमदारा सयत दोन भाजपा आमदारांच्या मतदारसंघांत तांणी व्हड यश मेळयलें. फकत मडगांवांत ते 86 मतांनी फाटीं उरले.
दक्षीण गोंयांत विरियातो फर्नांडीस हांकां 2,13,678, भाजपाच्या पल्लवी धेंपो हांकां 2,01,376 मतां, जाल्यार रिव्हॉल्यूशनरी गोवन्सच्या (आरजीपी) रुबर्ट परेरा हांकां 17,205 मतां मेळ्ळीं. दरेक लोकसभा वेंचणुकेंत दक्षीण गोंयांतले आठ मतदारसंघ निर्णायक थारतात. हे खेपे वेंचणुकेच्या निकालांतल्यानय तें दिसून आयला. साश्टींत कुडतरी (9,185), नुवें (10,895), फातोर्डा (2,437), बाणावली (14,181), नावेली (5,770), कुंक्कळी (6,032) आनी वेळ्ळीं (13,350) ह्या सात मतदारसंघात मेळिल्ल्या आघाडीक लागून विरियातो हांकां जैत मेळप सोंपें जालें. मंत्री सुभाष फळदेसाय, आदले उपमुख्यमंत्री बाबू कवळेकार हांणी पुराय यत्न करुन लेगीत विरियातो हांकां 784 मतांनी आघाडी मेळ्ळी. सरकाराक तेंको दिवपी अपक्ष आमदाराच्या मतदारसंघांत लेगीत विरियातो 1923 मतांनी मुखार आशिल्लें अशें निकालांतल्यान दिसून येता.
2022 वर्साचे वेंचणुकेंत अपक्ष म्हणून वेंचून आयिल्ल्या कुडतरीचे आमदार आलेक्स रेजिनाल्ड आनी कुठ्ठाळींचे आमदार आंतोन वाझ हांणी भाजपा सरकाराक तेंको दिलो. ते उपरांत मंत्री आनी नुवेंचे आमदार आलेक्स सिक्वेरा आनी मडगांवचे आमदार दिगंबर कामत हेर स आमदारां वांगडा भाजपांत आयले. देखून लोकसभा वेंचणुकेंत साश्टींच्या ह्या चार मतदारसंघांनी भाजपाच्या उमेदवाराक जिखपाची संद मेळटली असो अदमास भाजपाच्या थळाव्या आनी केंद्रीय फुडाऱ्यांनी काडलो. पूण, तांचें अदमास पुरायपणान चुकीचो थारलो.
हेर इकरा मतदारसंघांनी भाजपा उमेदवार पल्लवी धेंपोक फुडाकार मेळ्ळो तरी फोंडें (4,756), शिरोड्यां (4,985), मुरगांव (2,065), वास्को (3,231), दाबोळें (2,724), कुडचडें ( 1,697) हांगा धेंपो हांची आघाडी पांच हजारा सकयल मतां आसा. फकत मडकय (10,748), सावर्डे (9,511), काणकोणां (7,132) आनी सांग्यार (5,320) ह्या चार मतदारसंघांनी तांकां पांच हजारां परस चड मतां मेळ्ळ्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
