भांगरभूंय | प्रतिनिधी
येवपी काळांत भाजपाक सत्तेंतल्यान भायर दवरपाचेर नदर
मडगांव, प्रतिनिधी : लोकसभेंत दक्षीण गोंयचे जनतेचें आनी लोकशायेचें जैत. राज्यांतल्या नुस्तेंमार, टॅक्सीचालक, शेतकारांचेर अन्याय जाल्लो ताचें हें जैत. राज्यांत वाडिल्ल्या भ्रश्टाचार आड लोकांनी तिडक उक्तायली, अशें काँग्रेसीचे उमेदवार कॅ. विरियातो फर्नांडीस हांणी सांगलें.
मतांनी फुडाकार मेळ्ळ्या उपरांत कॅ. विरियातो फर्नांडीस हांणी सांगलें, जाती -धर्माच्या नांवान भाजपा लोकां मदीं फूट घालपाचो यत्न करता. ज्या कुठ्ठाळे मतदारसंघांत प्रधानमंत्री मोदी हांणी सभा घेतली त्या मतदारसंघांत काँग्रेसीक ३ हजार मतां मेळ्ळीं. हें भाजपा, मोदीचें अपेस. ह्यान फुडें विधासभा वेंचणुकेंत काँग्रेसची सत्ता येतली. दक्षीण आनी उत्तर गोंयांत भाजपान २०० कोटींचो खर्च केला. ते पयशे गरिबांक वाटिल्ले जाल्यार तांकां ताचो फायदो जावपाचो. येवपी काळांत भाजपाक सत्तेंतल्यान भायर दवरपाचेर नदर आसतलें. हातूंतल्यान खुबशे प्रस्न सुट्टले, अशें कॅ. विरियातो हांणी म्हणलें.
राज्यांतल्या सगळ्या विरोधी पक्षांनी एकठांय येवन ही वेंचणूक लढली. दक्षीण गोंयांत भाजपाचें अपेस म्हळ्यार तें पक्षांतर केल्ल्यांचेंय अपेस जावन आसा. दक्षीण गोंयांत आघाडी उमेदवाराचें जैत हें लोकांचें जैत. विरोधी पांच आमदारांनी सत्ताधारी १५ आमदारांक फाटीं घातले. आमच्यां मदीं फूट घालपाचोय यत्न जालो, मात तें भाजपाक शक्य जावंक ना. मतदारांनीय आघाडीच्या उमेदवाराक साथ दिवन धर्माच्या आधाराचेर फूट केन्नाच पडची ना हें दाखोवन दिलें. पैशांची तांक, चेंपण आनी प्रशासकीय यंत्रणां आसूनय लोकांची तांक श्रेश्ठ थारली. आघाडीच्या सगळ्या पक्षांनी एकठांय येवन जैत रचलें. आमी पयलेच फावट वेंचनू आयिल्ले आमदार आसून लेगीत रणनीती आखून काम केलें. कुंकळ्ळे सगळ्यांत चड मतां मेळ्ळीं आनी येवपी विधानसभा वेंचणुकेंत ३० परस चड सुवातांचेर जैत मेळटलें. काँग्रेसची सत्ता येतली, अशें तांणी म्हणलें.
हे लोकसभा वेंचणुकेंत काँग्रेस आमदारां मदीं फूट घालपाचो पुरायेन यत्न केलो. म्हाका सांगताले युरी सेट जालो आनी युरीक सांगताले एल्टन आत्तां पयशे घेवन गेला म्हणून. केपेंचे लोक काँग्रेसी वांगडा रावले. बरो उमेदवार दिल्ल्यान दक्षीणेंतले लोक काँग्रेसी वांगडा रावचे, अशें एल्टन हांणी सांगलें.
लोकांनी एकवटान रावन हें जैत आघाडीच्या उमेदवाराक मेळोवन दिलें. विरोधकांनी एकवटान काम केल्यार लोकांचो फायदो जातलो हें दिसून आयलें. हो मार्ग हाचे फुडें कायम उरतलो. नवे खासदार कॅ. विरियातो हे संसदेंत बरें काम करतले, अशें व्हेंझी व्हिएगस हांणी म्हणलें.
भ्रश्ट सरकार, पक्षांतरा आड लोकांनी मतां दिल्यांत :सरदेसाय
राज्यांतल्या भ्रश्ट सरकार, पक्षांतरा आड लोकांनी मतां दिल्यांत हें ह्या निकालांतल्यान दिसून आयलां. इंडिया आघाडेंतले पक्ष फुडेंय वांगडा रावतलें आनी गोंयचे उदरगतीचीं काम करतले, अशें मत आमदार विजय सरदेसाय हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
