भांगरभूंय | प्रतिनिधी
ह्यांग ही चान हाणें निमाण्या खिणाक केल्ल्या गोलाचे मजतीन दक्षीण कोरियान एच गटांत काल जाल्ले मॅचींत बळिश्ट पुर्तुगालाक 2-1 अशा गोल फरकांनी हारयलो. ह्या जैतान ताणें निमाण्या 16तली सुवात निश्चीत केली.
ही चान हाणें दुसऱ्या अर्दाच्या इंज्युरी टायमांत हो म्हत्वाचो गोल केलो. ताका लागून उरुग्वेची बाद फेरयेंत सुवात मेळोवपाची आस्त सोंपली. उरुग्वेन एच गटांतले दुसरे मॅचींत घानाक 2-0 असो हारयलो. पूण तरी आसतना ताचें सर्तींतलें आव्हान सोंपलें.
पुर्तुगालान आपल्यो सुरवातीच्यो दोन मॅची जिखून पयलींच बाद फेरयेंतली सुवात निश्चीत केल्ली. पूण, कोरियाक हारोवन जैताची हॅट्रीक मात ताका करपाक जमूंक ना. ही चानान सोन मिनाच्या पासाचेर निर्णायक गोल केलो, ताका लागून कोरियान एच ग्रुपांत दुसरे सुवातेर रावन ताणें फुडले फेरयेंत सुवात मेळयली.
कोरिया आनी उरुग्वे हांचे समान चार गूण जाले. पूण, आशिया पंगड बरे गोल फरकाच्या अंतरान फुडले फेरयेंत सुवात मेळोवपाक येसस्वी थारलो.
ही चाना पयलीं दक्षीण कोरिया वतीन किम यंग ग्वोनान 27व्या मिनटाक बरोबरीचो गोल केल्लो. पुर्तुगाला वतीन रिकार्डो होर्तान पांचव्या मिनटाक गोल केल्लो.
अल रेयानांत जाल्ले मॅचींत पुर्तुगालान पांचव्या मिनटाक गोल करून दक्षीण कोरियाचेर चेपण हाडिल्लें. रिकार्डोन दिएगो डलोटाच्या पासाचेर केलो. फुडले फेरयेंत सुवात मेळोवपा खातीर कोरियाक खंयचेय परिस्थितींत जैत गरजेचें आशिल्लें. ताका लागून ताणें आपल्या फॉरवर्डांत चड खेळगडे दवरिल्ले.
दक्षीण कोरियान रोखडोच बरोबरीचो गोल केलो. क्रिस्तियानो रोनाल्डोक कॉर्नर कीक योग्य रितीन भायर धाडपाक शकलो ना आनी बॉल दक्षीण कोरियाचो डिफॅण्डर किम यंग ग्वोना कडेन गेलो. ताणें गोल करपाक कसलीच चूक करूंक ना.
पुर्तुगालान प्रतिहल्ले सुरू केले. पूण, किम सियोंग ग्यू हाणें रोनाल्डाचे हल्ले येसस्वी रितीन परतावन लायले. पुर्तुगालान हल्ले चालूच दवरले. पूण, किंग सियोंग ग्यू हाणें सगले हल्ले परतावन लायले. पयल्या अर्दांत ताणें पांच खेपे गोलपोस्टाचो बचाव केलो आनी मध्यांतरा मेरेन आपल्या पंगडाक 1-1 असो बरोबरींत दवरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
