भांगरभूंय | प्रतिनिधी
पार्लः भारत आनी दक्षीण अाफ्रिका हांचे मदल्या तीन वन-डे मॅचींचे माळेंतली तिसरे आनी निर्णायक मॅचींत भारतान पयलीं बॅटींग करून 297 धांवड्यांचें लक्ष्य दक्षीण अाफ्रिके मुखार दवरलां. पयलीं बॅटींग करतना संजू सॅमसनाच्या शेंकड्याच्या खेळी नेटार भारतान 296 धांवड्यांचो दोंगर उबारलो. भारतान 8 विकेटी वगडावन 296 धांवड्यो केल्यो.
दीर्घ काळा उपरांत टीम इंडियेंत पुनरागमन करतना संजू सॅमसनान आपल्या वन-डे कारकिर्दीतलो पयलो शेंकडो नोंदयलो. ताणें 44 वे ओवरींतल्या निमाण्या बॉलाचेर एक धांव घेवन आपलो शेंकडो पुराय केलो. ताचो हो आंतरराष्ट्रीय क्रिकेटींतलो पयलो शेंकडो. संजू सॅमसनान 114 बॉलांनी 4 चवके आनी 3 सक्यांचे मजतीन 108 धांवड्यो केल्यो. लिझाद विल्यमसनच्या बॉलाचेर संजू रीझा हेंड्रिक्स वरवीं कॅचआवट जालो.
संजू सॅमसनान मुखेली के एल राहुल (21) वांगडा 50 धांवड्यांची भागिदारी केली. वट्ट 101 धांवड्यांचेर के एल राहुलाची विकेट विआन मुल्डरान घेतली. ते उपरांत तिलक वर्मा सयत संजू हांणी डावाची बाजू सांबाळ्ळी. संजू आनी तिलक हांचे मदीं 135 बॉलांनी 116 धांवड्यांची भागिदारी जाली. तिलक वर्मा (52) पंगडाच्याे 276 धांवड्यो आसतना बाद जालो. केशव महाराजान ताची विकेट घेतली.
रिंकू सिंगान आपले शैलीत धांवड्यो केल्यो. 27 बॉलांनी 38 धांवड्यांनी इनींग खेळून तो बाद जालो. रिंकू वांगडा वॉशिंग्टन सुंदर हांणीय उत्कृश्ठ खेळी केली. तो 9 बॉलांनी 14 धांवड्यो करून बाद जालो.
अशा प्रकारान टीम इंडियेन 50 ओवरींनी 8 विकेटी वगडावन 296 धांवड्यो केल्यो. खेळपट्टीचे स्वरूप लक्षांत घेतल्यान ही जैताची धांवसंख्या मानतात. हें मॅचींत दक्षीण आफ्रिके कडल्यान बुरेन हेंड्रिक्सान तीन जाल्यार नांद्रे बर्गरान दोन विकेटी घेतल्यो. लिझार्ड विल्यम्स, व्हिआन मुल्डर आनी केशव महाराज हांणी दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
