भांगरभूंय | प्रतिनिधी
सुपरस्पोर्ट्स पार्क मैदानाचेर चालू आशिल्ले पयले टॅस्टीच्या दुसऱ्या भारताच्या पंगडान काडिल्ल्या 245 धांवड्यांचो फाटलाव करतना दक्षीण आफ्रिकेन डीन एल्गराच्या शेंकड्या नेटार 11 धांवड्यांची आघाडी घेतली. दुसऱ्या दिसाचो खेळ सोंप मेरेन दक्षीण आफ्रिकेन 5 विकेटी वगडावन 256 धांवड्यो केल्ल्यो. एल्गर 140 धांवड्यांचेर नाबाद आसा.
भारता वतीन जसप्रीत बुमरा आनी मोहम्मद सिराज हाणें दरेकी 2 विकेटी घेतल्यो. एल्गरा वांगडा मार्को यानसन 3 धांवड्यो करून खेळपट्टीचेर आसा.
ते पयलीं भारतान 8 बाद 208 धांवड्यां वयल्यान मुखार खेळपाक सुरवात केली आनी 37 धांवड्यांची भर घालून 245 मेरेन मजल मारली. विकेटकीपर बॅट्समन लोकेश राहुलान सको मारून आपलो शेंकडो पुर्ण केलो. राहुलान 137 बॉलांनी 101 धांवड्यांची खेळी केली. हातूंत 14 चवक्यांचो आनी चार सक्यांचो आस्पाव आशिल्लो.
सेंच्युरियनांत राहुलान नोंदयिल्लो हो दुसरो शेंकडो थारलो. हाचे पयलीं म्हणल्यार 2021त ह्याच मैदानाचेर ताणें शेंकडो मारिल्लो. विकेटकीपर म्हणून नोंदयिल्लो ताचो हो पयलोच शेंकडो आसा. राहुलान टॅस्ट कारकिर्दींत आठ शेंकडे मारल्यात. तातूंतले सात शेंकडे हे विदेशी भुंयेर आयल्यात. दक्षीण आफ्रिका आनी इंग्लंड ह्या देशांनी ताणें दरेकी दोन शेंकडे मारल्यात. जाल्यार श्रीलंका, वॅस्ट इंडीज आनी ऑस्ट्रेलिया ह्या देशांनी एकेक शेंकडो नोंदयला. भारतांत फकत एक शेंकडो मारला.
दक्षीण आफ्रिकेचो सदचो मुखेली टेम्बा बावुमा जखमी जाल्ल्यान एडन मार्करमा वांगडा एल्गार डावाची सुरवात करपाक आयलो. मार्करम पांच धांवड्यो करून बाद जालो. ते उपरांत टोनी डी जॉर्जी 28, किगन पिटरसन 2 धांवड्यो करून तंबूंत परतलो. ते उपरांत एल्गारान डॅव्हिड बेडिंगहॅमा वांगडा मेळून डाव मुखार व्हेलो आनी डावाक आकार दिलो. दोगांयनी शेंकड्याची भागिदारी केली. हेडिंगहॅमान 7 चवके आनी दोन सक्यांचे मजतीन 56 धांवड्यो करून बाद जालो. कायल वेरीन 4 धांवड्यो करून तंबूंत परतलो. पूण, एल्गारान आपली उत्कृश्ट खेळी चालूच दवरली.
एल्गार कारकिर्दींतली निमाणी माळ खेळटा. ताणें माळे पयलींच निवृत्तीची घोशणा केल्ली.
तिसऱ्या सत्रांत फकत 17 ओव्हरींचोच खेळ जालो. उण्या उजवाडाक लागून खेळ बेगीन थांबोवचो पडलो. ह्या सत्रांत आफ्रिकेन 2 विकेटी वगडावन 62 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
