भांगरभूंय | प्रतिनिधी
पणजी, प्रतिनिधी : दक्षीण गोंय लोकसभा उमेदवारी खातीर बायलांचो विचार करपाची सुचोवणी भाजपाच्या संसदीय मंडळान केल्या उपरांत पक्षान बायलां उमेदवारांचो सोद सुरू केला. पक्षाचे विचारसरणीक लागीं आशिल्ल्या बायलांचो विचार करून तांचीं नांवां संसदीय मंडळाक धाडटले, अशें मुख्यमंत्री डॉ. प्रमोद सावंत हांणी स्पश्ट केलां.
भाजपाचे कोअर समितीचे बसकेंत आयज सुवर्णा तेंडुलकार, विद्या गावडे आनी शेफाली वैद्य हांच्या नांवांची चर्चा जाली. ह्या तीन नांवां सयत आनीकुय कांय नांवां मुखार येवप शक्य आसा. ह्या दोन ते तीन दिसांत सर्वेक्षण करून पक्ष नांवां धाडटलो, अशें डॉ. सावंत हांणी स्पश्ट केलां.
बायलांक 33 टक्के आरक्षण दिवपी विधेयक संमत जालां. हे फांटभुयेर उमेदवारी खातीर बायलांचो विचार करचो, असो आदेश संसदीय मंडळान दिला. हाका लागून उमेदवारी खातीर बायलां उमेदवारांचो विचार करचो पडलो, अशें मुख्यमंत्र्यांनी सांगलें.
दिगंबर कामत आनी रमेश तवडकार हांणी आपूण जावन वेंचणूक लढोवपाक इत्सुक नाशिल्ल्याचें सांगलां. पक्षान पयलीं ज्या तीन नांवांचीं शिफारस केल्या तांचो विचार चालूच आसा. अॅड. नरेंद्र सावयकार, चंद्रकांत कवळेंकार आनी दामु नायक हीं तीं नांवां. जिखून येवपाचे तांकीचेर उमेदवारी थारतली, अशें डॉ. सावंत हांणी सांगलें. ह्या वेळार प्रदेश अध्यक्ष सदानंद शेट तानावडे हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
