भांगरभूंय | प्रतिनिधी
मडगांव, प्रतिनिधी : लोकसभे खातीर बायल उमेदवाराक संद दिवन भाजपान व्हडली खेळी खेळ्ळ्या आनी बायल उमेदवार वेंचून काडल्यार इतिहास घडोवपाची संदूय लोकांक दिल्या. दक्षीण गोंयांत भाजपा आनी कॉंग्रेस अशी सरळ लढाय जरी दिसली तरी कॉंग्रेसीन आप, गोवा फॉरवर्ड, राष्ट्रवादी कॉंग्रेस अश्या विरोधी पक्षां कडेन आघाडी केल्या. परंपरीक मतां, आघाडींतल्या पक्षांच्या प्रचाराचेर कॉंग्रेसीचे जैत निंबून आसा. मात, भाजपान ह्या वेळार संघटणेच्या नेटार, मंत्री आमदारांच्या जनसंपर्काचेर जैत मेळोवपाची मोख दवरल्या.
कॉंग्रेसीच्या उमेदवारांनी दोन फावटीं जनतेचो घात करून पक्षांतर केलां. बाबू कवळेंकार हांच्या नेतृत्वाखाला जुलय २०१९त धा कॉंग्रेसीच्या आमदारांनी भाजपांत प्रवेश केल्लो. उपरांत वेंचणुको जाले उपरांत कॉंग्रेसीचे इकरा आमदार वेंचून आयिल्ले, मात भितरल्या राजकारणाक लागून सप्टेंबर २०२२ त आमदार दिगंबर कामत हांच्या नेतृत्वा खाला आनीक आठ आमदारांनी भाजपांत प्रवेश केलो. हाका लागून लोकांचो कॉंग्रेसी वयलो विस्वास उणो जालो. हाचो परिणाम आदल्या वेंचणुकांचेर जाला.
बायलांच्या मतांचेर उमेदवारांचो फुडार
नुव्यां २८,३७४ मतदार आशिल्ल्यान तातूंत १३०३२ दादले आनी १५३४२ बायलो मतदार आसा. कुडतर्यां ३०२५९ मतदार आशिल्ल्यान तातूंत १४५०५ दादले आनी १५७५४ बायलो आसात. फांतोड्डें मतदारसंघांत १४५६४ दादले आनी १६२४० बायलो अशे ३०८०४ मतदार आसात. मडगांवां १४६३५ दादले आनी १५४३३ बायलो आनी ४ तृतीयपंथीय मतदार अशे मेळून वट्ट ३००७२ मतदार आसात. बाणावले १३६५४ दादले, १५३१० बायले अशे २८९६४ मतदार आसात. नावेले २८८०२ मतदार आशिल्ल्यान तातूंत १४११० दादले आनी १४६९२ बायलो मतदार आसात. कुंकळ्ळ्यां १४००१ दादले, १५५३२ बायलो मेळून २९५३३ मतदार आसात. वेळ्ळी १४८७२ दादले आनी १६६६७ बायलो अशे वट्ट ३१५४९ मतदार आसात.
भाजपा कडेन सक्षम नेतृत्व, कार्यकर्त्यांचें बळ
दक्षीण गोंय लोकसभा वेंचणुकां खातीर मुख्यमंत्री डॉ. प्रमोद सावंत हांचे कडेन भाजपा वटेंतल्यान प्रदेशाध्यक्ष सदानंद शेट तानावडे हांचे सयत मंत्री रवी नायक, सुभाष शिरोडकार, आलेक्स सिक्वेरा आनी सगळे आमदारूय कार्यकर्त्यां सयत प्रचारांत वांटेकार जातात. भाजप सरकारान केल्ल्यो पांयाभूत सुविधायो आनी येवजण्यो लोकांक सांगता. कॉंग्रेसी कडेन विरोधी पक्ष फुडारी आनी दोन आमदारां बगर कोणूच फुडारी ना, राज्या भायले फुडारी हांगा चलचे ना. नेतृत्वाचो उणाव, पक्षांत एकवट नासप, आदल्या कार्यकर्त्यांचो वांगड नासप ह्यो गजाली कॉंग्रेसीच्या मतां मदीं उणाव हाडपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
