भांगरभूंय | प्रतिनिधी
म्हापशें, प्रतिनिधी ः कान्सा थिवी हांगा ओला इलेक्ट्रीक स्कुटरीक ट्रकान चुकीचे दिकेन धपको दिल्ल्यान सुजाता साळगांवकार (26 रा. नास्नोळा बार्देस) हे तरणाटे चलयेक मरण आयलें. अपघाता उपरांत दुबावीत ट्रक चालकान थंयच्यान पळ काडलो. हें चली अमेझॉन डिलिव्हरी सेल्सगर्ल म्हणून काम करतालें.
हो अपघात शेनवारा दनपारां 1.05 वरांच्या सुमाराक घडलो. जीए 08 टी 5494 क्रमांकाचे ट्रक माडेल सावन अस्नोडा वटेन वतालो. जाल्यार सुजाता जीए 03 एएक्स 2254 क्रमांकाच्या ओला इलेक्ट्रीक स्कुटर घेवन उरफाटे दिकेन येताले. कान्सा- थिवीच्या स्टेट बँक ऑफ इंडिया लागसार दुबावीत ट्रक चालकान चुकीचे दिकेन वतना मुखार येवपी स्कुटरीक धपको दिलो. ट्रकान धपको दिले उपरांत सुजाता स्कुटरी वयल्यान उसळून रस्त्यार पडले आनी गंभीर जखमी जाले. उपरांत ताका म्हापशें जिल्लो हॉस्पिटलांत उपचारा खातीर दाखल केलें, पूण ताका मरण आयलें.
हे घडणुकेची म्हायती मेळटकच कोलवाळ पुलीस निरिक्षक विजय राणे हांणी उप निरिक्षक सुभाष गांवकार, हवालदार रामा राऊत, अनिल शेटये, हरीश रेडकार हांचे वांगडा थंय वचून पंचनामो केलो. कोलवाळ पुलीस पळून गेल्ल्या ट्रक चालकाचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.