भांगरभूंय | प्रतिनिधी
दुबाविताक अटक; दोग जखमी
म्हापशें: थिये राज हावसींग बोर्ड कॉलनींत शुल्लक कारणा वेल्यान दोगां इश्टांचेर सोऱ्याचे घुंवळेंत सुरी हल्ल्याचो प्रकार घडलो. ह्या प्रकरणांत कोलवाळ पुलिसांनी दुबावीत आरोपी प्रेम सागर भगत (21, मूळ छत्तीसगड) हाका अटक केल्या.
हो प्रकार सोमारा 25 वेर दनपारां 1.30 वरांचेर घडलो. ह्या सुरी हल्ल्यांत सुमीत तापावो (छत्तीसगड) आनी कागाळदार तानाजी पठाण (बेळगांव) हे जखमी जाल्यात. जखमींचेर गोमॅकाँत उपचार करून तांकां घरा धाडून दिल्यात.
जखमी आनी दुबावीत आरोपी घडणूक थळा वेल्या एकाच बांदकाम प्रकल्पाचेर काम करतात आनी थंयच ते रावतात. जेवणा खातीर हाडपी कड्डना वेल्यान जखमी सुमीत आनी दुबावीत प्रेम सागर भगत हांचे मदीं वाद जाल्लो. घडणुकेच्या दिसा होळये निमतान जखमी, दुबावीत आनी आनीक एकलो अशे चौग जाण सोरो पियेवपा खातीर बशिल्ले. थंय सुमीत आनी प्रेम हांचे मदीं सोऱ्याचे घुंवळेंत परतून वाद जालो आनी थंय दुबावितान सुमीत हाच्या गळ्याचेर सुरयेन हल्लो केलो. तांचे मजती खातीर आयिल्लो कागाळदार तानाजी हाचेरूय ताणें सुरयेचो वार केलो.
उपरांत दुबावितान घडणूक थळा वेल्यान पळ काडलो. जखमींक रोखडेंच हॉस्पिटलांत दाखल केले. ह्या प्रकरणांत पुलिसांनी दुबाविता आड भादंसंच्या 324 कलमा खाला गुन्यांव दाखल केला आनी मंगळारा दुबाविताक अटक केली. फुडलो तपास पुलीस उपनिरिक्षक सुभाष गांवकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
