भांगरभूंय | प्रतिनिधी
म्हापशें: थिये धुमास्कार हॉस्पिटला कुशीक भुंयगत 700 एमएम तांकीची उदका पायपलायन फुटली. हाका लागून हजारांनी लिटर उदकाचें लुकसाण जालें. उदका पायपलायनींतल्यान व्हड प्रमाणांत व्हांवन गेल्लें उदक कांय घरांनी गेल्ल्यान त्या कुटुंबांची गैरसोय जावन लुकसाण जालें.
ही घडणूक काल (मंगळारा) सांजवेळा 4 वरांच्या सुमाराक घडली. घडणूक थळार दाब वाडिल्ल्यान भुंयगत आशिल्ली उदका पायपलायन अचकीत फुटली. ताका लागून व्हड प्रमाणांत उदक व्हांवन रस्त्यार फोंड पडलो. तशेंच रस्त्या कुशीचे देंवतेर आशिल्ल्या कांय घरांनी उदक गेलें.
थॉमस ब्रागांझा हांच्या घरांत व्हड प्रमाणांत उदक गेलें. ताका लागून सामानाचें लुकसाण जालें. तशेंच हेरूय कांय घरांनी उदक वचून लुकसाण जालें.
हे घडणुकेची म्हायती मेळटकूच भौशीक बांदकाम खात्याच्या उदक पुरवण विभागान उदका पायपलायनीची उदका पुरवण बंद केली आनी रोखडेंच दुरुस्तीचें काम झुजा पांवड्यार हातांत घेतलें. ह्या उदका पायपलायनींतल्यान बार्देस म्हालांतल्या कांय वाठारांनी उदका पुरवण जाता. ही पायपलायन फुटिल्ल्यान ह्या वाठारांनी उदकाचो उणाव निर्माण जाला.
ही पायपलायन दुरुस्त करून फांतोडेर मेरेन उदका पुरवण सुरू जातली अशी म्हायती अधिकाऱ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
