भांगरभूंय | प्रतिनिधी
गंभीर परिणामाची धमकी; विनयभंग केल्ल्याचो आरोप
म्हापशें: कायद्याचे चौकटेंत न बसपी फायली मंजूर करूंक नाशिल्ल्याच्या कारणा वेल्यान थियेच्या सरपंचाक आनी उपसरपंचाक गाळी संवून विनयभंग आनी गंभीर परिणामाची धमकी दिल्ल्या प्रकरणांत पंच वांगडी अर्जून आरोसकार हांचे आड उपसरपंच अॅड. हर्षदा कळंगूटकार हांणी कोलवाळ पुलिशेंत कागाळ केल्या.
कागाळींत नमूद केल्ले प्रमाण हो प्रकार बुधवारा 24 वेर दनपारां 12.30 वरांच्या सुमाराक पंचायत मंडळाचे म्हयनाळे बसके वेळार घडलो. दुबावीत पंच वांगडी आरोसकार हांणी आपल्या प्रभागांतल्या मतदारांच्या फायद्या खातीर तांच्यो कांय वैयक्तीक कामांच्यो फायली बसकेंत मान्यताये खातीर सादर केल्ल्यो. ह्यो फायली बेकायदो स्वरुपाच्यो आशिल्ल्यान त्यो सरपंचान ना मंजूर केल्यो. बसकेच्या विशय पत्रिकेचेर चर्चे उपरांत सरपंचाचे परवानगीन येवपी विशया वेळार दुबावीत अर्जून आरोसकार हांणी फायली मंजूर करूंक नाशिल्ले खातीर वाद घातलो.
तशेंच बसका सोंपले उपरांतूय दुबावीत पंच वांगड्यान सरपंच आनी म्हाका उपसरपंचाक वायट उतरांनी गाळी संवल्यो आनी गंभरि परिणामाची धमकी दिली तशेंच म्हाका बळजबरीन धक्को दिलो. ह्या वेळार पंच शिवदास कांबळी आनी मायकल फर्नांडीस हांणी मध्यस्ती करून हातघाईची पुनरावृत्ती करची न्हय अशी ताकीद आरोसकार हांकां दिली.
ह्या वेळार अजापाची आनी सामकी लजेक घालपी गजाल म्हणल्यार घडणूक थळार हाजीर आशिल्लीं दोन बायलां आनी एक दादलो अशे तीन पंच वांगडी हे घडणुकेचो आनंद घेताले आनी दुबाविताक आडावपाची तसदी लेगीत घेतली ना असो आरोप कागाळदारान केला.
हो दुबावीत पुरायपणान त्रस्त, हताश आनी व्यथीत जाल्लो दिसता. ताका लागून तो कायदो हातांत घेवपाची शक्यताय आसा. जर एखाद्या पंच वांगड्यान अशा गुन्यांवकारी दबावान सरपंचाक बेकायदो कामां करपाक भाग पाडल्यार सरपंचाक आपलें कर्तव्य प्रामाणीकपणान आनी तन्मयतायेन पार पाडप कश्टाचें थारतलें.
भौशीक कार्यालयाचो वापर करून बेकायदो फायली निकालांत काडपाची सरपंच आनी उपसरपंचाक धमकी दिवप हो गंभीर गुन्यांव आसून कायदो हातांत घेवचे पयलीं दुबावीत पंच वांगडी अर्जून आरोसकार हांचेर दंडात्मक कायद्या वरवीं खर कारवाय करची अशी मागणी ह्या कागाळी वरवीं उपसरपंच अॅड. कळंगूटकार हांणी पुलिसां कडेन केल्या.
मजगतीं, ह्या कागाळी बरोबर सरपंच व्यंकटेश शिरोडकार, पंच वांगडी शिवदास कांबळी, मायकल फर्नांडीस, गीता शेळके आनी प्रिती आरोलकार हांणी हे घडणुकेचो लिखीत कबुली जबाब दिवन संबंदीत दोशींचेर खर कारवाय करपाची मागणी कोलवाळ पुलीस निरिक्षका कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
