भांगरभूंय | प्रतिनिधी
अपघाता उपरांत चालक फरारी
पेडणें: मोरजेच्या कांचोळेवाडा वाठारांत मंगळारा १७ जुनाक रातचो जाल्ल्या भिरांकूळ अपघातांत एके बायलेक मरण आयलें. जाल्यार दोग जाण गंभीर जखमी जाले. ह्या प्रकरणांत मांद्रें पुलिसांनी थार गाडी चालक आनी गाडी धनया आड विवीध कलमां खाला गुन्यांव नोंद केला.
पुलिसांनी दिल्ले म्हायती प्रमाण, रातच्या सुमार १०.५० वरांचेर आश्वेंच्यान मोरजे वेगान येवपी महिंद्रा थार वाहनान पयलीं रस्त्या कुशीक उबी आशिल्ली होंडा ऍक्टिव्हा दुचाकीक धपको दिलो. उपरांत मुखारच्यान येवपी यामाहा फॅसिनो आनी होंडा ग्राझिया ह्या दोन दुचाकींक नेटान धपको दिवन मुखार उबो आशिल्ल्या टॅम्पोकूय धपको दिलो.
ह्या अपघातांत यामाहा फॅसिनो फाटल्यान बशिल्ले एके अनवळखी बायलेक मरण आयलें. दुचाकीवेले देबाशीष सामल (३२, मूळ ओडिशा) आनी गतीश सामल (३५, मूळ ओडिशा) हे जखमी जाल्यात. जखमींक उपचारा खातीर हॉस्पिटलांत दाखल केल्यात.
अपघाता उपरांत थार चालक विक्रम अशोक गाबा (रा. हरियाणा) हो वाहन घडणुके सुवातेर सोडून फरारी जालो. तशेंच जखमींक मजत करिनासतना वा पुलिसांक म्हायती दिनासतना तो पळून गेल्ल्याचो आरोप आसा. संबंदीत थार वाहन खासगी आशिल्ल्यान ती भाड्यान चलोवपाक दिल्ल्या प्रकरणांत वाहन धनी रोहित राठोड हाचे आडूय कारवाय केली.
हे घडणुके प्रकरणांत मांद्रें पुलीस स्टेशनांत गुन्यांव दाखल केलो. फुडलो तपास पुलीस उपनिरीक्षक जयदीप आर. पालयेंकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
