‘थारा’ वयले निर्बंध आनी एआय कॅमेऱ्याक येवकार

भांगरभूंय | प्रतिनिधी

उत्तर गोंय रेंट अ कॅब संघटणेचे बसकेंत एकमत

पणजीः येरादारी उल्लंघनाचेर चाबूक मारपी एआय कॅमेरांक आमी येवकारातात. पूण हे यंत्रणेंतल्यान येवपी तालांव धपक्याक मोबायलार धाडचे आनी तांकां चड दीस कळाव करचे न्हय जेणेकरून हो दंड पर्यटकां कडल्यान वसूलप सोंपें जातलें. तशेंच जे निर्बंध सरकारान थार ह्या मोटारीचेर घाल्यात तांकां आमी येवकार दितात, अशें उत्तर गोंय रेंट अ कॅब संघटणेचे अध्यक्ष नितेश चोडणकार हांणी सांगलें.

परवरे मंगळारा गोवा रेंट अ कॅब संघटणेची बसका जाली. हे बसकेंत सगले लिसेन्स धारक रेंट अ कॅब धनी हजर आशिल्ले. बसके विशीं म्हायती दितना चोडणकार हांणी सांगलें, पर्यटक सोरो पियेवन वाहन चलयतात आनी ते कोणाक मारून आपल्या राज्यांनी वाटेक लागतात. पूण गाडी कोण भाड्याक दिता ताचेर कारवाय जाता. देखून हे तालांव धपक्याक दिवचे ही मागणी आमी दोन वर्सां सावन करीत आयल्यात.

उल्लंघन जाताकच आमकां तेन्नाच मॅसेज येवपाक जाय की आमकां इतलें चलना पडलां. देखून ही गाडी भाड्याचेर आसतना तो दंड आमकां गिरायकां कडल्यान वसूल करपाक मजत जातली. सद्या तालांव 10-15 दिसांनी येतात आनी पर्यटक आपल्या गावांनी गेले उपरांत ते फोन घेनात. सोरो पियेवन गाडी चलोवप, सीट बॅल्ट, सिग्नल मोडप हे सगले तालांव धपक्याक पडपाक जाय. येरादारी मंत्र्यांनी हें केले जाल्यार आमचेर उपकार जातले, अशें चोडणकार हांणी म्हणलें.

जे कायद्यान गाडयो भाड्याक दितात तांचे मोबायल नंबर नोंद आसतात. उल्लंघन जाले उपरांत मोबायलाचेर मॅसेज येतकच ते मॅसेज आमी मागीर गिरायकांक दाखोवपाक शकतात. आमी गिरायकां कडल्यान अंडरटेकींग बरोवन घेतात आनी ताचेर गाडी दिवपाची आनी परतून करपाची तारीख बरयिल्ली आसता. हे तारखे भितर जर तालांव आयले जाल्यार तो मान्य करपाक शकतात. जर तो मान्य करिना जाल्यार आमी न्यायालयांत वचपाची शिटकावणी तांकां दिवपाक शकतात, अशें चोडणकार हांणी सांगलें.

जे निर्बंध थार रेंट अ कॅबाचेर घाल्यात ते सगले आमी मान्य करतात. आमी थारयिल्ले प्रमाण रेंटाक दिवपा खातीर आमी नवी थार विकती घेवचे नात. ज्यो अस्तिवांत थार गाडयो आसात त्योच आमी भाड्याक दितले. पोरणी गाडी विकून त्या गाडयेच्या परमिटाचो वापर आमका नवी थार घेवपाक मेळचे ना, अशें स्पश्टीकरण चोडणकार हांणी दिलें.

सद्या जे थारीक लागून अपघात जातात ते खाजगी आनी डुप्लीकेट नंबर प्लेटीक लागून जातात. रेंट अ कार खातीर थार विकती घेता तेन्ना कंपनीच भितर 80 कि. मि. मर्यादा आशिल्ले स्पीड गव्हर्नर बसोवन दिता. पूण खाजीग आनी डुप्लीकेट नंबर प्लेटीचेर स्पीड गव्हर्नरांचेर कसलेच निर्बंध ना. हें सगलें अपघात हे थारींक लागून जातात आनी सरकारान हाचेर ख्यास्त करपाची गरज आसा, अशें चोडणकार हांणी म्हणलें.