भांगरभूंय | प्रतिनिधी
पणजी, बातमीदार ः थानांच्या कॅन्सरा आड ‘फेसगो’ इंजेक्शन सामकें बरें. गोमेकॉत 4 फेब्रुवारी सावन थानांच्या कॅन्सरा खातीर तें मुफत दितले, अशी घोशणा भलायकी मंत्री विश्वजीत राणे हांणी आयज केली. तशेंच कॅन्सर दुयेंतींक डीडीएसएवाय येवजणे खाला हाडपाचे यत्न सुरू आसात अशेंय तांणी सांगलें.
थानांच्या कॅन्सरा संबंदीत 1 लाख बायलांची तपासणी मंगळारा पुराय जाली. हे विशीं आयोजीत केल्ले कार्यावळींत मंत्री राणे उलयताले. ह्या वेळार गोमेकॉचे डीन डॉ. शिवानंद बांदेकार, भलायकी संचालक डॉ. गीता काकोडकार आनी हेर अधिकारी हाजीर आशिल्ले.
राज्यांतल्या कॅन्सर दुयेंतींक डीडीएसएसवाय येवजणे खाला फुकट उपचार मेळचे हे खातीर आमी यत्न करतात. हे विशीं मुख्यमंत्री डॉ. प्रमोद सावंत हांचे कडेन चर्चा करतले. हे खातीर येवजणेंत कसो बदल करूं येता हाचो विचार करपाक एक समिती स्थापन करतले. समितीच्या अहवाला उपरांत तो मंत्रीमंडळ बसकेंत सादर करतले. उपरांत मुख्यमंत्री निमाणो निर्णय घेतले अशें मंत्री राणे हांणी सांगलें.
हाचे आदीं आमी डिजिटल डायबेटिस रजिस्ट्री केल्या. तशेंच फुडल्या दोन म्हयन्यांत राज्यांतल्या कॅन्सर दुयेंतींची डिजिटल नोंदणी सुरू जातली. हाचे भायर राज्यांतल्या सगल्या वैजकी प्रयोगशाळांक कॅन्सर दुयेंतींची म्हायती भलायकी खात्याक दिवप सक्तीचें थारतलें. हे संबंदी बेगोबेग अधिसुचोवणी जारी करतले अशेंय तांणी सांगलें. फुडल्या दोन वर्सांत राज्यातले टर्शरी कॅन्सर सेंटर पुराय जातलें. हे खातीर प्रधानमंत्री नरेंद्र मोदीन गोंयाक मजत केल्या. ह्या प्रकल्पाचेर ते खासा लक्ष दितात, अशेंय मंत्री राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
