भांगरभूंय | प्रतिनिधी
मुख्यमंत्री : नुस्तें उद्देग गोंयकारांच्या हातांत उरप गरजेचो
भांगरभूंय । प्रतिनिधी
पणजी: थळाव्या नुस्तेमार भावांचें हीत जपपा खातीर सरकार विवीध यत्न करता. बेगिनूच नुस्त्या उद्देग खात्या वतीन गोंयांतल्या परंपरीक नुस्तेमारांक, विक्रेत्यांक कार्ड दितले. फक्त असलें कार्ड आसप्यांकूच गोंयांत नुस्तें विकपाक मेळटलें, अशी घोशणा मुख्यमंत्री डॉ. प्रमोद सावंत हांणी केली. बिरेस्तारा पणजी राष्ट्रीय नुस्तें शेतकरी दिसा निमतान आयोजीत कार्यावळींत ते उलयताले. ह्या वेळार मंत्री नीळकंठ हळर्णकार, संचालिका शमिला माँतेरो, सचीव प्रसन्न आचार्य आनी हेर अधिकारी हाजीर आशिल्ले.
मुख्यमंत्र्यान सांगलें, सध्या गोंयांत नुस्तें उद्देग सोडल्यार हेर सगळे वेवसाय दुसऱ्या राज्यांतल्या लोकांच्या हातांत गेल्यात. नुस्त्याचो उद्देग थळाव्यांच्या हातांत उरप गरजेचो. हाका लागूनच थळाव्या नुस्तेमारांक कार्ड दितले. गोंयांत पंदरा वर्सां रावपी आनी नुस्त्याच्या उद्देगांत आसपी मनशांक अशें कार्ड दितले. थळाव्या नुस्तेमारांनीय दुसऱ्या राज्यांतल्या लोकांक नुस्तेमारी वेवसायांत प्रवेश करपाक दिवचो न्हय. नुस्तें कांपपाचें, धुवपाचेंय काम थळाव्यांक दिवचें.
नुस्त्याचो उद्देग आपल्याच हातांत उरचो म्हूण थळाव्यांनीय यत्न करप गरजेचें. थळाव्या नुस्तें विक्रेत्यांनी आपलो जागो दुसऱ्या राज्यांतल्या मनशांक चलोवपाक दिवचो न्हय. वा आपल्या नुस्तेमारी कार्डार दुसऱ्याक विक्रेची परवानगी दिवची न्हय. ह्या वेवसायांत खूब पयसो आसा. हें समजले उपरांत दुसऱ्या राज्यांतले लोक ह्या वेवसायांत येवपाक पळयतले. हाका लागून थळाव्यांनी सादूर रावपाक जाय, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
