थंड सोलकडी

भांगरभूंय | प्रतिनिधी

गीम सुरू जावन दोन म्हयने जायत आयले. तातूंत मे म्हयन्याची उश्णताय कितली धोक्याची, हें आमकां सगळ्यांक खबर आसा. अशे परिस्थितींत उश्णतायेंतल्यान सुटका मेळोवपाक जिणे पद्दतींत कांय बदल करप गरजेचे. खास करून खावपा- पिवपाचे संबंदी गिमाच्या दिसांनी खूब जतनाय घेवची पडटा. ह्या दिसांनी कुडीक भितरल्यान थंड दवरुंक शकतात, अश्या गजालींचो तुमच्या आहारांत आस्पाव करात. भलायके खातीर फायदेशीर अशी ही एक रेसिपी.
नाल्लाच्या दुदा पसून आनी कोकमच्या आंबट रोसा पसून तयार केल्ली ही रेसिपी पचपाक बरी मानतात.तिचें नांव सोलकडी. कांय कडेन नाल्ल वापरिनासतना ती करतात. तिका तिवळ म्हणटात.
सोलकडयेक लागपी सामान –
एका नाल्लाचें दूद, 5- 6 सोलां, 6 पाचव्यो मिरसांगो, 5- 6 लसूणाच्यो पाकळ्यो. एक चमचो हळद, अर्दो कप कोथंबीर, 4 चमचे तेल, रुची प्रमाण मीठ.
सोलकडी करपाची पद्दत –
पयलीं ताज्या नाल्लाचे कुडके करुन मिक्सरांच्या आयदनांत घेवन तातूंत थोडें उदक घालून पेस्ट तयार करात. सुती कपड्यांतल्यान प्युरी गाळून, तातूंतल्यान नाल्लाचें दूद वेगळें करचें. उपरांत सोला, मिरसांग, कोथबीर वांटून घेवची. लसूण कुसकुसून घेवची. कायलींत तेल गरम करून तातूंत लसूण तळसून घेवची. उपरांत पाचवें वांटप घालून, थोडी हळद आनी नाल्लाचें दूद घालून रुची प्रमाण मीठ घालचें. हें सगळें एकठांय मिक्स करात. उपरांत सोलकडी फ्रिजांत थंड जावपाक दवरात.
ही सोलकडी तुमी घरांत करुन पळयात, खास करून जेन्ना नॉन वेज जेवण आसता. सोलकडी पचनाक बरी.