भांगरभूंय | प्रतिनिधी
म्हापशें, प्रतिनिधी ः पुलीस कॉन्स्टेबल प्रथमेश गावडे हाच्या आत्महत्या प्रकरणांत अटक केल्ल्या प्रिती चव्हाण (२३) आनी तनिका चव्हाण (२१) ह्या दोनूय बायलां पुलीस कॉन्स्टेबलांनी कोलवाळचे बंदखणींत आत्महत्त्या करपाचो यत्न केलो. बायलां कैदी विभागाच्या माळयेर आशिल्ले उदकाचे टाकये वेल्यान त्या दोगांयनी उडकी मारली. हातूंत तांकां दुखापत जाली. त्या दोगांकूय उत्तर गोंय पुलीस सेवेंतल्यान निलंबीत केला. हे विशींचो आदेश पुलीस अधीक्षक अक्षत कौशल हांणी जारी केला.
ही घडणूक बिरेस्तारा सकाळच्या १०.५५ वरांचेर घडली. दुबावितांक सकाळीं बंदखणींतल्या सेलांतल्यान भायर काडिल्लीं. सेलाचे गेटीवेल्यान तीं दोगांय माळयेर आशिल्ले उदकाचे टांकयेर चडलीं. उपरांत त्या दोगांयनी एकामेकांचो हात धरून वांगडाच सकयल उडी मारली. हें अंतर सुमार तीन मिटरांचे उंचायेचें आशिल्लें. ताका लागून त्या दोगांकूय व्हडलीशी जखम जावंक ना. म्हापशें जिल्लो हॉस्पिटलांत उपचार करून डिस्चार्ज दिले उपरांत तांकां परत बंदखणींत धाडलीं. दोगांयची भलायकी बरी आसा. हे घडणुके उपरांत बंदखणींतल्या सुरक्षीततायेचो प्रस्न परत मुखार आयला.
बंदखणींतल्या वरीश्ठ अधिकार्यांनी घडणुके सुवातेर भेट दिवन पळोवणी केली आनी घडणुकेचो नियाळ घेतलो.
मजगतीं, २५ ऑक्टोबर दिसा पुला वेल्यान उडी मारुन पुलीस कॉन्स्टेबल प्रथमेश गावडे हाणें आत्महत्या केल्ली. प्रथमेशाक आत्महत्त्या करपाक लायिल्ल्या आरोपा खाला गुन्यांव दाखल करून दुबावीत प्रिती आनी तनिष्का हांकां ४ ऑक्टोबराक अटक केल्ली. उपरांत तांकां मंगळारा ५ ऑक्टोबराक न्यायालयान कोलवाळ बंदखणींत धाडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
