भांगरभूंय | प्रतिनिधी
पणजी : गोंय विद्यापीठांत रिमोट सेन्सिस आनी जीआयएस अभ्यासक्रमा खातीर जायरात केल्ल्या पदां विशीं कुलगुरूंनी आजूनय समाधानी जापो दिवंक ना. जो मेरेन आमकां जापो मेळनात तो मेरेन आमी ही पदां भरपाक दिवचे नात. आंदोलन करतले, अशी शिटकावणी गोवा फॉरवर्डचे फुडारी प्रशांत नायक हांणी सोमारा पणजे जालें पत्रकार परिशदे वेळार दिल्या.
ह्या वेळार दीपक कळंगूटकार आनी दिलीप प्रभुदेसाय हाजीर आशिल्ले. नायक हांणी मुखार उलयतना सांगलें, ह्यान पयलींय आमी ह्या पदांचे भरतीक विरोध केल्लो. हे विशीं आयज आमी कुलगुरूंची भेट घेतली तेन्ना आमी तांकां आरक्षीत पदां कित्याक काडलीं? पंदरा वर्सां रयवासी आशिल्ल्याचे अटीक कित्याक मेकळीक दिली असो प्रस्न विचारलो. मात आमकां कुलगुरूंनी ह्या प्रस्नांची योग्य जाप दिवंक ना. खंयचींय पदां भरचे पयलीं अभ्यासक्रम तयार आसप गरजेचें. मात मेळिल्ले म्हायती प्रमाण, विद्यापीठान आजूय हो अभ्यासक्रम जाहीर करूंक ना.
विद्यापीठान आमच्या प्रस्नांच्यो जापो दिवच्यो. ना जाल्यार आमी व्हड आंदोलन करपाक समर्थ आसात. विद्यापीठाचे कुलपती म्हणून राज्यपालांनीय हाची दखल घेवप गरजेचें. विद्यापिठा कडल्यान आमकां प्रतिसाद मेळूंक ना जाल्यार आमी राज्यपालां कडेन वतले. दिक्षांत समारंभांत राज्यपालांनी गोंय विद्यापीठांत थळाव्यांक प्राधान्य दितले अशें सांगिल्लें. मात सध्या हांगा थळाव्यांक सोडून फकत मर्जेंतल्या लोकांकूच घेतात, अशें तांणी मुखार म्हणलें.
फाटले फावट भेट घेतिल्ली तेन्ना कुलगुरूंनी आमकां हो अभ्यासक्रम नवो आशिल्ल्यान हांगा थळावे उमेदवार मेळनाशिल्ल्याचें सांगिल्लें. मात अशेच तरेचो अभ्यासक्रम मडगांवां चौगुले कॉलेजींत फाटलीं सात ते आठ वर्सां जालीं सुरू आसा. तशेंच बोर्ड सरकारी महाविद्यालयांतूय होच अभ्यासक्रम सुरू आसा. विद्यापीठांत हो अभ्यासक्रम नव्यान सुरू जाता तरी कायमचे जागे कित्याक भरिनात? हाचीय जाप मेळप गरजेचें, अशें प्रभुदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
