…. तो तोंडाचो कॅन्सर आसपाक शकता!

भांगरभूंय | प्रतिनिधी

सध्या तोंडाच्या कॅन्सराच्या दुयेंतींत खूब वाड जाल्या. पूण हो रोग वेळार कळना जाल्यार तो येसस्वीपणान बरे जावंक शकता. देखून तोंडाच्या कॅन्सराचीं सुरवातीचीं लक्षणां वळखून बेगोबेग वैजकी सल्लो घेवप खूब गरजेचें. हाका लागून उपचार चड प्रभावी जाता आनी दुयेंती बरे जावपाची शक्यताय वाडटा.
तोंडाचो कॅन्सर सुरवातेच्या काळांत कळ्ळ्यार ताचेर येसस्वी उपचार करूं येतात. पूण चड करून दुयेंती ताचे कडेन आडनदर करतात कारण ह्या दुयेंसाचीं सुरवातीचीं लक्षणां दुखनाशिल्लीं वा ल्हान आसतात. देखून हो कॅन्सर पातळत गेल्यार उपचार चड गुंतागुंतीचे जातात आनी ताचो परिणाम दुयेंतींच्या जिणेच्या दर्ज्याचेरूय जाता. देखून ह्या रोगाचीं सुरवातीचीं लक्षणां वळखून बेगोबेग वैजकी सल्लो घेवप गरजेचें.

तोंडाच्या कॅन्सराचीं लक्षणां खंयचीं? (तोंडाच्या कॅन्सराच्यो शिटकावणी दिवपी लक्षणां)
दोन सप्तकांपरस चड काळ तोंडांतलो फोड, तोंडांत धवे वा तांबडे पॅच, गालाच्या भितरल्या भागांत गांठ वा दाट जावप, दुखप, चवकपाक वा गिळपाक त्रास जावप, दांत सुटप, तोंडांत सुन्न जावप वा कसलेंच स्पश्ट कारण नासतना रगत येवप हीं तोंडाच्या कॅन्सराचीं सुरवातीचीं लक्षणां आसूं येतात. आवाजांत बदल जावप, गळो दुखप, मानांत सुज वा गांठ येवप अशा लक्षणां कडेन आड नदर करचें न्हय. जर तुमकां हीं खंयचींय लक्षणां दिसलीं जाल्यार रोखडींच वैजकी तपासणी करप गरजेचें.
सिगारेट ओडप, तंबाखू खावप, गुटखा वा पान मसालो, नेमान सोरो पियेवप, तोंडाची नितळसाण उणी आसल्यार तोंडाच्या कॅन्सराचो धोको खूब वाडटा. पूण व्यसन नाशिल्ल्या लोकांकय तोंडाचो कॅन्सर जावं येता. देखून दरेकल्यान तोंडाचे भलायकेचेर नेमान लक्ष दिवपाची गरज आसा.
तोंडाचो कॅन्सर जावचो न्हय म्हूण सगळ्या प्रकारच्या तंबाखूचो वापर पुरायपणान टाळप, सोर्‍याच्या सेवनाचेर नियंत्रण दवरप, तोंडाची नितळसाण दवरप, ताजीं फळां आनी भाजयो आहारांत आस्पावप आनी दंतवैजां कडल्यान नेमान तोंडाची भलायकी तपासणी करप म्हत्वाचें. हाचे भायर दर म्हयन्याक तोंडाची भलायकी तपासपाची संवय करची. तोंडांतले बरे जावंक नाशिल्ले फोड, तांबडे वा धवे पॅच वा हेर खंयचींय असामान्य लक्षणां दिसल्यार कळाव करिनासतना दोतोराचो सल्लो घेवचो. कारण तोंडाच्या कॅन्सराचेर सुरवातीच्या काळांत निदान जाल्यार ताचेर येसस्वी उपचार जावंक शकतात आनी दुयेतींक बरें जिवीत जगूंक मेळटा.