भांगरभूंय | प्रतिनिधी
कोण कल्पना करपाक शकचो ना, अशें काम एका 19 वर्सांच्या तरणाट्यान केलां. ऑस्ट्रेलियन यूट्यूबर नॉर्म हाणें सगल्यांत चड वेळ जागो रावपाचो गिनीज वर्ल्ड रेकॉर्ड मोडला. तो सेगीत 12 दीस जागो रावन विश्वविक्रम करपाक लागलो. ताच्या यूट्यूब चॅनलाचेर ताचें लायव्ह स्ट्रीमिंगूय जालें. तातूंत तो जागो आशिल्ल्याचें दाखयलें. मात ताका जायत्या समस्यांक सामकार वच्चें पडलें.
डेली स्टाराचे बातमे प्रमाण, नाॅर्माक बारा दीस जागो राविल्ल्याचें पळोवन ताचे चाहते हुस्केले. तांणी अधिकाऱ्यांक ताची तपासणी करपाक आपयले. नाॅर्म म्हणटा, ताका विक्रम करपा पसून आडावपाक सगले यत्न जाले. ताणें रंबल हे सोशल मिडियाचेर ही कामगिरी लायव्ह केली. ताणें 264 वरां 24 मिनटांचो विक्रम मोडलो तेन्ना ताका णव हजार लोक लायव्ह पळयताले.
हाचे आदीं न्हिदनासतना रावपाचो विक्रम रँडी गार्डनर हाच्या नांवार आशिल्लो. तो 1964 त पिरायेच्या 17 व्या वर्सा 11 दीस जागो राविल्लो. त्या काळांत ताका भ्रम जावपाक लागले. ते आयज पसून ताका जातात. उपरांत शास्त्रज्ञांनी ताचो अभ्यास केलो. गिनीज बूक ऑफ वर्ल्ड रेकाॅर्ड संस्थेन मार्चांत जाहीर केल्लें कीं आमी हाचे मुखार न्हिदे संबंदी विक्रम नोंदोवन घेवचे नात. हाचो अर्थ नाॅर्माक ताच्या विक्रमा खातीर अधिकृत मान्यताय मेळची ना. तशेंच इनामूय मेळचें ना.
दोतोरांच्या म्हणण्या प्रमाण, तीन दिसां परस चड काळ जागो रावल्यार लोकांक मनोविकाराचो अणभव येता. कूड ऑफलायन जाता. दोळे बंद जायनात, पूण मेंदू मायक्रो स्लीप खातीर बंद जाता. तेन्ना कारण नासतना जागरण करप्यांनी सादूर रावचें. कांय जाणांक फांतोड जाय मेरेन मोबायलाचेर सोशल मिडिया, सिनेमा, व्हिडियो पळोवपाचें वेसन आसता. फांतोडेर चार मेरेन जागरण केलें जाल्यार दुसरे दीस दनपरां एक जालें तरी जाग येना. हाचो पिरायेची चाळीशी हुपली काय भलायकेचेर परिणाम जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
