भांगरभूंय | प्रतिनिधी
भोवतेक दिसाळ्यांनी 3 जूनाच्या आसपास उजवाडाक आयिल्ली ‘पुलीस प्रशिक्षण केंद्रातल्या मेस्त (कार्पेंटर) खात्यांतल्या कर्मचाऱ्यांची बार्देस मामलेदार कार्यालयांत वेंचणुकेचे प्रक्रिये खातीर नेमणूक करून ताका युडीसीचें काम दिलां’, ही बातमी वाचली. तो सरकारी जांवय जाला अशेंय हे बातमेंत म्हणलां. हे खबरेच्या मुळाक वचून सविस्तर म्हायती सोदून काडपाचो यत्न केलो, तेन्ना खरी परिस्थिती वेगळीच आशिल्ल्याचे कळ्ळें.
उल्लेख केल्ल्या कर्मचाऱ्याक सरकारी आदेशा खाला बार्देशांत हाडलो. हेर कार्यालयांचे कर्मचारी विधानसभा ते पंचायत वेंचणूक प्रक्रिये खातीर खात्या खाला मागणी प्रमाण वेगवेगळ्या विधानसभा मतदारसंघांच्या कामां खातीर आपयतात. मामलेदार कचेरीतले कर्मचारी आपल्या दिसपट्ट्या कामांत व्यस्त आशिल्ल्यान वेंचणूक प्रक्रियेंतले जाणकार कर्मचारी दरेक वेंचणुकेंच्या वेळार आपयतात. वेंचणूक प्रक्रिये खातीर जाय आशिल्ली दिसपट्टी म्हायती वेंचणूक आयोगाच्या मार्गदर्शना खाला तयार करून ती उण्या वेळान धाडप गरजेचें आसता. ही प्रक्रिया केन्ना केन्ना गुंतागुंतीची आसता आनी संगणक आनी हेर प्रशासकीय कामांचें गिन्यान आनी अणभव आसप म्हत्वाचें. अशा व्यक्तींक हें काम दितात.
आतां एक सरकारी कर्मचारी जो मेस्त म्हूण कामाक आसा, तो आपल्या कामा भायर प्रशासकी आनी संगणकी कामांत कुशळ आसा, तो बरो शिकिल्लो आसा, जाल्यार ताका वेंचणूक प्रक्रियेंत आस्पावन घेवप ना अशी खंयच नोंद ना. उरफाटें प्रशासकी कामाची म्हायती आशिल्ल्यान ताची तोखणाय करची. असो सरकारी कर्मचारी निस्वार्थीपणान सरकाराक कसली तरी मजत करता जाल्यार ताका त्या गजालींचो फायदो जाता अशें म्हणप चुकीचें आनी अर्थहीन.
मेस्त कर्मचारी आसतना ताका वरिश्ठ कारकून पदाची (यूडीसी) जापसालदारकी दिल्ली, अशेंय बातमेंत म्हळां. चवकशी वेळार ताका असो खाशेलो आदेश दिल्लो, असो दस्तावेज ना, पूण सादारण मनीस लेगीत अशीं जापसालदारक्यो हातांत घेता देखून तो वरिश्ठ कारकून जायना, जाल्यार तो आपल्या वरिश्ठांनी दिल्ल्या कामाच्या आदेशांक पाळो दिता. एक वरिश्ठ कारकून वेंचणुकेचे प्रक्रियेचें काम सहजपणान हातांत दिता अशें न्हय. सरकारी कर्मचाऱ्यांक वेंचणुकेचे प्रक्रियेंत आस्पावन घेतना तांच्या कामाच्या पांवड्याचेर कामाचे वांटप करतात, तांच्या पदाच्या आदाराचेर न्हय.
हो कर्मचारी सुटयेच्या दिसांनी लेगीत काम वेळार पुराय करून वेळ फुकट घालनासतना नेमान कार्यालयांत हाजीर आसता. देखून सरकाराचो जांवय जावपाचो प्रस्नच येना. कसलेंच काम करिनासतना जाय तेन्ना येवप- वचप आनी स्वताचें काम दुसऱ्याचेर घालून सरकारी खजिन्याचेर हक्क दाखोवप हांकां ‘सरकाराचो जांवय’ म्हणटात. तसल्यो ‘सुनो’य आसात.
उल्लेख केल्लो मेस्त कर्मचारी पदवीधर आनी संगणक विशयांत कुशळ आसा. ताका कायद्याचेंय गिन्यान आसा. पुलीस खात्यांत आयले उपरांत फाटल्या 32 वर्सांत ताका बडटी मेळूंक ना. ह्या पदाक बडटी दिवपाक खात्यान उदासीनताय दाखयल्या. सरकारी नोकऱ्यांनी पगारा वांगडा बडटी आसूंक जाय, पूण खात्याक परत परत विनवणी करून लेगीत बडटी दिनासतना ताची फायल धुल्ल खायत पडल्या आनी वरिश्ठांनी मुद्दाम ताचे कडेन दुर्लक्ष केलां. वरिश्ठांच्या कामा भायल्या आदेशा कडेन आडनदर केल्ल्यान ताची बदली केल्ली. फाटलीं 18 वर्सां तो पर्वरी सावन वाळपय मेरेन प्रवास करता. ताका मानसीक दबावा खाला दवरपाचो यत्न जालो. पंचायती वेंचणुके पयलीं जायते फावटीं ताणें वेंचणूक प्रक्रियेच्या कामांची वांटणी केल्ली तेन्ना खंयच्या सरकाराक त्रास जालो आनी कितें लुकसाण जाला, असो प्रस्न उप्रासता.
फाटलीं कांय वर्सां म्हापशें मामलेदार कार्यालयांत बसून आशिल्ले, स्वताच्या कामा भायर दुसऱ्यांच्या कामांत लक्ष घालपी कामचुकार आनी सरकाराच्या खऱ्या जावंयांनी, तशेंच विधानसभा वेंचणुके खातीर हेर खात्यांतल्यान हाडिल्ल्या कांय लोकांनी पत्रकारांक फटीची म्हायती दिवन निसुवार्थी आनी प्रामाणीक सरकारी कर्मचाऱ्याचें मनोबळ उणें करपाचो हो एक यत्न. आपले परस हुशार आशिल्ल्या एका प्रामाणीक कर्मचाऱ्याचो दुस्वास करपाचो हो प्रकार.
– रमेशचंद्र कुडाळकर
म्हापशें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
