तोखणायः गोंयच्या संकेतान संवसारांतलो सगळ्यांत उंच खार्दुंग-ला पास सायकलीन हुपलो

भांगरभूंय | प्रतिनिधी

म्हापशें, प्रतिनिधी ः संकेत सुरेश नायक हांणी लडाखाचे जायते पयसुल्ले पास फकत सायकलीन हुपल्यात. संकेत नायक हो पर्यावरण जागृत दळाचो वांगडी आसा. फाटल्या जायत्या वर्सांत ताणें जायतीं मिशनां थारायल्यांत आनी तीं पुराय केल्यात. खार्दुंग-ला पास ही लडाखांतल्या भारतीय केंद्रशासित प्रदेशातील लेह जिल्ह्यांतली एक दोंगरी खिंड जावन आसा. हे खिंडीतल्यान वचपी हो रस्तो संवसारांतलो सगळ्यांत उंच रस्त्या मदलो एक. ताची उंचाय 5359 मि म्हळ्यार 19,982 फूट आसा. काळोख आनी बदलपी हवामान, बर्फाळ वातावरण, फातरांचो रस्तो, थंड तापमान, ऑक्सिजनाच्या उणावाक लागून स्वास घेवपाची समस्या अश्या सगळ्या आडमेळींचेर ह्या गोंयच्या संकेतान हट्टीपणान मात करून हो रस्तो हुपलो.
सांकेतान खार्दुंग ला पास वांगडाच मनाली-लेह आनी श्रीनगर-लेह प्रवास सायकलीन केला. हालींच ताणें श्रीनगर सावन लेह मेरेन आव्हानात्मक, रोमांचक, विस्मयकारक 450 किमी चो प्रवास सायकलीन पुराय केला. ह्या प्रवासात ताचे वांगडा फाल्वियन सुतारी आशिल्लो. हिमालयाचे कठीण वाठार, ऊंच तेमकां, बर्फान भरिल्ले रस्ते, थंड तापमान, दोंगराचे दर्यादेग हुंपून हो प्रवास फकत आठ दिसांत पुराय केलो. दोन वर्सां आदीं ताणें मनाली-लेह मार्गावयलो 13,051 फूट रोहतांग पास, 16,040 फूट बरलाचो पास, लाचुलुंग ला पास 16,598 फूट आनी तांगलांग ला खिंडी पास 17,480 फूट उंचाय हुंपून मनाली-लेह प्रवास सायकलीन पुराय केल्लो.
श्रीनगरांतल्या लाल चौकांतल्यान सुरू जाल्लो हो आव्हानात्मक प्रवास 450 किमी. अंतर हुपुन लेह हांगा सोंपलो. ह्या प्रवासांत संकेत हाणें 11,649 फूट उंचायेचेर झोजी ला, 12,198 फूट उंचायेचेर नामिका ला आनी ह्याच मार्गा वयली सगळ्यांत उंचायेची 13,479 फूट फोटू ला ह्यो खिंडी पार केल्यो. श्रीनगरासावन गांदरबल, कंगन, सोनमर्ग, झोजी ला, द्रास, कारगिल, मुलबेख, नमिका ला, फोटू ला, लामायुरू, खालत्से, निम्मू आनी निमाणें लेह असो ह्या प्रवासाचो मार्ग आशिल्लो.
वयलो प्रवास 10 हजार फूट उंचायेची खिंडी हुपपा खातीर सांकेतान फावो ती तयारी केल्ली. ऑक्सिजनाच्या उणावाक लागून स्वास घेवपाचे त्रास जावचे न्हय म्हूण आनी वातावरणाक अनुकूल जावपाखातीर श्रीनगर, कुलन, सोनमर्ग, द्रास, कारगिल, वाखा, चिपकांगचन, उलेटोकपो ह्या सुवातींनी थांबून हो प्रवास पुराय केलो.
ताचें ‘गोवन वार्ता’चे तरंग पुरवणींत 2020 त बरयिल्ल्या लेखांचें ‘एक पॅडल आनंदासाठी’ हें पुस्तक हालींच उजवाडाक आयलां. तातूंत ताणें आपले भोंवडेचे अणभव सादे उतरांनी मांडल्यात. गोंय वांगडाच ताणें महाराष्ट्र, कर्नाटक, केरळ, तमिळनाडू, तेलंगणा, अस्तंत बंगाल, सिक्किम, खडाख, ​​हिमाचल प्रदेश, जम्मू काश्मीर तशेंच बांगलादेश, नेपाळ, चीन आदी देशाच्या शिमे मेरेनचो प्रवास तांणे सायकलीन केला.