भांगरभूंय | प्रतिनिधी
तोंडांत वा ताळ्या कडेन जाल्ल्यो जखमो, गांठ वा आवाजांत जाल्लो बदल हाचे कडेन जायते फावटीं आडनदर करप जाता. मात हींच लक्षणां हेड आनी नॅक कॅन्सराचे सुरवातेचीं लक्षणां आसपाक शकतात, अशी शिटकावणी तज्ञांनी दिल्या.
भारतांतल्या सगळ्या कॅन्सर दुयेंतीं मदल्या सुमार २६% ते ३०% दुयेंतींक हेड आनी नॅक कॅन्सर आशिल्ल्याची म्हायती मेळ्ळ्या. हाचें मुखेल कारण तंबाखू, गुटखा, बीडी, सिगरेट आनी हेर संवयींकडेन संबंदीत आसा. हेर कॅन्सरापरस हें प्रमाण चड आसा.
संवसारीक भलायकी संघटनेच्या (डब्ल्यूएचओ) खाला आयएआरसी ग्लोबल कॅन्सर ऑब्जर्व्हेटरीच्या म्हणण्या प्रमाण, संवसारभर सुमार ९.३ ते ९.५ लाख नवे हेड आनी नॅक कॅन्सराचे दुयेंती मेळ्ळ्यात. देशांत दर वर्सा सुमार १० ते १२ लाख नवे कॅन्सर दुयेंती सांपडटात. ह्या कॅन्सरांतले सुमार ३० टक्के कॅन्सर हेड आनी नॅकाचो जाता. तंबाखू, गुटखा, सीगारेट ओडप, सोर्याचें वेसन आनी कांय व्हायरल संसर्ग हीं ह्या कॅन्सराचीं मुखेल कारणां मानतात. विशेश म्हळ्यार हो कॅन्सर सुरवातीच्या काळांत मेळ्ळो जाल्यार तो पुरायपणान बर जावपाची शक्यताय चड आसता.
तज्ञांच्या म्हणण्या प्रमाण, तीन सप्तकां परस चड काळ तोंडांत दुखप, ताळ्या भितर घावे वा तांबडे दाग, उदक वा जेवण गिळपाक त्रास जावप, ताळो सामको दुखप, मानेची गांठ वा आवाजांत बदल जावप अशीं लक्षणां दिसल्यार रोखडीच दोतोराचो सल्लो घेवप गरजेचें. हे विशीं म्हायती दितना डॉ. प्रथमेश पै (मुखेली – हेड ऍण्ड नेक कॅन्सर विभाग, ग्लेनईगल्स हॅास्पीटल, मुंबय) हांणी सांगलें, चडशे दुयेंती दोतोरा कडेन येवपाक कळाव करतात. सुरवातीच्या काळांत मेळपी हेड आनी नॅक कॅन्सराचे ८० ते ९० टक्के दुयेंतींक येसस्वीपणान बरे करूं येता. देखून तोंडांतल्या खंयच्याच फोडाचेर आडनदर करचें न्हय. हेड आनी नॅकाच्या कॅन्सराचो धोको आडावपा खातीर योग्य जिणे पद्दत आपणावप आनी भलायकी तपासप गरजेचें आसता. तंबाखू, गुटखा, खैनी, मावा, सुपारी, बीडी आनी सिगरेट पिल्यार हो कॅन्सर जाता. तंबाखूच्या उत्पादनां पसून जावपी गजाली टाळप हो ह्या दुयेंसाचेर आळाबंदा हाडपाचो पयलो आनी सगळ्यांत प्रभावी उपाय. सोरो पियेवप पुरायपणान बंद केल्यार, तंबाखू आनी सोरो, सुपारी हांचो मेळून वापर केल्यार हेड आनी नॅक कॅन्सराचो धोको जायत्या पटींनी वाडटा.
तोंडाची नितळसाण दवरप आनी नेमान दंतांची तपासणी करप हेंय ह्या दुयेंसाचेर आळाबंदा हाडपाचे नदरेन म्हत्वाचें. समतोल आनी पुश्टीक आहार, खास करून फळां आनी पाचवीं भाजीपालो हाचो आस्पाव केल्यार कुडीची रोगप्रतिकार शक्त वाडटा. तोंडांत वा गळ्यांत कसलोय घावो, गांठ वा असामान्य बदल दिसल्यार २ ते ३ सप्तकां परस चड काळ ताचे कडेन आडनदर करिनासतना रोखडोच तज्ञ दोतोराचो सल्लो घेवप बरें. आदल्या तंबाखूचो वापर केल्ल्या लोकांक नेमान भलायकी तपासपाचो सल्लो डॉ. पै हांणी दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
