भांगरभूंय | प्रतिनिधी
पणजी, प्रतिनिधी : सुचना सेठाक आनीक १४ दिसांची न्यायालयीन बंदखण आयकयल्या. आपल्या स्वताच्या ४ वर्सां पिरायेच्या पुताचो बंगळुरूची आर्टिफिशिल इंटेलिजन्स कंपनीची संस्थापिका तशेंच सीइओ सुचना सेठ हिणें खून केल्लो. ह्या प्रकरणांत कळंगूट पुलिसांनी सेठ हिका बाल न्यायालयांत सोमारी हाजीर केली तेन्ना न्यायालयान तिका आनीक १४ दिसांचे न्यायालयीन बंदखण वाडयल्या.
सुचना सेठ हिणेंे ७ जानेवारीक रातचें सिकेरी-कांदोळेच्या हॉटेलांत स्वताच्या चार पिरायेच्या पुताचो खून केल्लो. उपरांत स्वताच्या हाताची शीर कापून आत्महत्त्या करपाचो यत्न तिणें केल्लो. मात तातूंत तिका अपेस आयलें. उपरांत तिणें आपल्या पुताची कूड बॅगेंत घालून गोंयच्यान बंगळुरू पळून वचपाचो यत्न केलो. मात कळंगुटे पुलिसांच्या शिटूकपणाक लागून सुचना सेठ कर्नाटक पुलिसांचे तावडेंत सांपडली. उपरांत कर्नाटक पुलिसांनी तिका अटक करून गोंय पुलिसांचे सुवादीन केल्या उपरांत तिका पयलीं म्हापशेंच्या पयलो वर्ग न्यायालयांत उबी केली. तेन्ना म्हापशें न्यायालयान तिका स दिसांची पुलीस बंदखण आयकयली. उपरांत न्यायालयान तिका न्यायालयीन बंदखण आयकयली.
मजगतीं, सुचना सेठ मानसीक नदरेक सारकी ना, असो दावो करून तिच्या बापायन बाल न्यायालयांत अर्ज सादर केल्लो. ताचेर सुचनाच्या बापायन केल्ल्या अर्जाचेर पुलिसांक आपलें म्हणणें सादर करपाचे निर्देश न्यायालयान दिल्ले. ते प्रमाण, कळंगूट पुलिसांनी फाटले सुनावणे वेळार आयपीएचबीच्या डॉक्टरांचो अहवाल न्यायालयांत सादर केलो. तातूंत सुचना मानसिक नदरेन बरी आशिल्ल्याचें नमूद केल्लें. हे विशीं तिच्या बापायन दाखल केल्ल्या अर्जाचेर सुनावणी जावन न्यायालयान निकाल राखून दवरला. मजगतीं तिची १४ दिसांची न्यायालयीन बंदखण सोंपिल्ली. तातूंत १४ दीस वाडयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
