भांगरभूंय | प्रतिनिधी
इश्टीणीन केली अपहरणाची कागळ
म्हापशें, प्रतिनिधी: शिवोले वेवसाय करपी एका डिजेक ड्रग्स तस्करी प्रकरणांत तेलंगणा पुलिसांनी उत्तर गोंयचे दर्यादेगे वयल्यान अटक केली. गोंय पुलिसांक म्हायती दिनासतना तेलंगणा पुलिसांनी ताका उखलून व्हेलो. हे घडणुके उपरांत डीजेचे इश्टीणीन पुलिशेंत ताच्या अपहरणाची कागळ दिल्या. हो डीजे मूळ दक्षिण भारतांतलो.
चार दिसां आदीं उत्तर गोंयच्या दर्यादेग वाठारांत आपूण पुलीस अशें सांगपी चार जाणांनी डीजेक ताब्यांत घेतिल्लो. ते उपरांत डीजेचे इश्टीणीन लागसारच्या पुलीस स्टेशना कडेन संपर्क सादलो. थंय चार जाणांनी डिजेक धरलो आनी व्हेलो अशें सांगलें. मात गोंय पुलिसांनी ताका धरूंक नाशिल्लो. देखून तिणें आपल्या इश्टाचें अपहरण केल्ल्याची म्हायती दिली. पुलिसांनी सोद घेतलो तेन्ना डीजेक तेलंगणा पुलिसांनी धरला अशें दिसून आयलें. ताचेर तेलंगणांत ड्रग्स तस्करीचो केस आसा अशेंय पुलिसांक कळ्ळें. उपरांत ही म्हायती गोंय पुलिसांनी कागाळदार बायलेक दिली.
मजगतीं, २०२३ वर्सा बार्देशांतल्या कांय सराफी लोकांक कोल्हापूर (महाराष्ट्र) पुलिसांनी चोरयेचें भांगर विकतें घेवपाच्या आरोपांत धरिल्ले. महाराष्ट्र पुलिसांनी थळाव्या पुलिसांक हे विशीं म्हायती दिवंक नाशिल्ली. राज्यभरांतल्यान भांगरावस्तीच्या वेवसायीकांनी हे अटके आड निशेध केल्लो. त्या वेळार पुलीस महासंचालकांनी आश्वासन दिल्लें की दुबावितांक रातच्या वेळार हेर राज्यांतल्या पुलिसांक अटक करपाक मेळची ना. तशेंच गोंयच्यान अटक करपाची इत्सा आसल्यार संबंदीत जिल्लो पुलीस अधीक्षकाक ताची कल्पना दिवची अशी सुचोवणी गोंयच्या पुलीस महासंचालकांनीय हेर राज्यांतल्या पुलिसांक दिल्ली. मात, वयले अटक कारवायेंत तेलंगणा पुलिसांनी गोंयच्या पुलीस महासंचालकाचे आदेश मोडल्यात हें स्पश्ट जाता.
मजगतीं, गोंय – तेलंगणा ड्रग्ज तस्करी प्रकरणांत ऑगस्ट २०२२ त तेलंगणा पुलिसांनी वट्ट १७४ जाणां आड गुन्यांव दाखल केल्लो. हातूंत गोंयचो स्टीव्ह उर्फ जॉन स्टीफन डिसोझा, एडवीन नुनीस, मंजूर अहमद, तुकाराम साळगांवकार, विकास नायक, रमेश चव्हाण हांचो आसपाव आशिल्लो. तेन्ना ह्या प्रकरणांत प्रीतेश बोरकार हाका हैदराबाद नार्कोटीक सक्तवसुली विभाग आनी ओस्मानिया युनिवर्सिटी पुलिसांनी अशेच तरेन अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
