भांगरभूंय | प्रतिनिधी
आगो, त्या शेजारच्या विठोबाच्या चेडवाक पय, कांय बरें तें शिकता आनी तूं आख्खो- आख्खो दीस त्या मोबायलाचेर
पडललें आसता; कितें तरी शिकून घे ताचे कडल्यान. म्हजे इश्टिणीक, रेखाक, काल ताचे आवयन म्हणलें, आनी आयज कॉलेजींत तें म्हाका ते विशीं सांगतालें. सांगतासतना एक म्हत्वाचो मुद्दो ताणें उखल्लो; रागान, बेजारून ताणें म्हळें, “अशें कशें म्हाका ती दुसऱ्यां कडेन ‘कम्पॅर’ करूं शकता? दर एकटो वेगळो जावन आसा आनी दर एकल्याची खाशेलताय लेगीत वेगळी आसता. हांवें दुसऱ्या भशेन कित्याक जांवपाचें गो? हांव म्हजें जिवीत म्हजे पद्दतीन जगतलें!”…..
…. आनी खरेंच हें आयकून म्हाका होलमलें- जायते फावट आमचे पालक दुसऱ्यांच्या भुरग्यां कडेन आमची तुलना करतात आनी अशें करून स्वताच्याच भुरग्याक तीं सकयल शेवटितात. हांवेनूय रेखाच्या सांगण्याक हयकार दिलो आनी ताच्या विचारांचेर म्हाका अभिमान भोगलो.
कांय वेळान रेखान मोबायलार वॉट्सॅप उक्तो केलो. विठोबाच्या चेडवान घाल्लो स्टॅटस पळयना फुडें ताणें इर्शेच्या, निर्शेणेच्या सुरान म्हणलें, “पय गो! विठोबाची चली कितलें करता… तें कितल्या सर्तीनीं भाग घेता आनी दर एके सर्तीन जिखून येता. तें वयले- वयले पांवडे चडत आसा, मात हांव हांगाच उरलां”. पयलीं म्हाका दिसलें आवयन जें म्हणिल्लें ताची खंत तें उक्तायता म्हूण. पूण मात्श्या वेळान आनीक कोणाचो स्टॅटस पळोवन ताणें परतें म्हणलें, “हो भुरगो वयले- वयले पांवडे चडत आसा. मात हांव हांगाच उरलां.” हाचे वयल्यान म्हाका कळून आयलें, कोण दुसरो ताची तुळां करीत ना करीत, पूण तें स्वता जावन आपली तुळां दुसऱ्यां कडेन करीत आसता म्हूण.
आनी खरेंच, स्वताची तुळां दुसऱ्यां कडेन करून आमीच स्वताक दुसऱ्यां परस उणें समजतात. आमी आमच्या जिवितांत कितें करता वा कितें करूंक शकतात तें पळोवचे परस, दुसऱ्यांच्या जिवितांत कितें चलता हाचो आमकां चड हुस्को.
स्वताक दुसऱ्या कडेन ‘कम्पॅर’ करपाचें बंद करूंया. स्वताच्या मनाचेर, विचारांचेर नियंत्रण दवरूंक शिकूया, स्वताच्या गुणांचेर विस्वास दवरूंक शिकूया. तुमी जो मेरेन स्वताक उखलून धरतल्यात, तो मेरेन संवसार तुमकां उखलून धरतलो आनी जो मेरेन तुमी स्वताकूच चेंपयतल्यात, तो मेरेन संवसारूय तुमकां चेपोवन दवरतलो.
मेगन दे सौजा
7218609502
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
