भांगरभूंय | प्रतिनिधी
तुयें पेडण्याच्या श्री भगवती देवीची वर्सुकी जात्रा आयज सोमारा 28 नोव्हेंबराक मनयतात. त्या निमतान देवस्थानाची थोडक्यात म्हायती.
गोमंत भुंय म्हटल्यार दक्षीण कोंकणची पुण्यनगरी कोंकण- काशी देवतांच्या देवळांनी भरिल्ली. हांगा उत्सव खूप उमेदीन मनयतात. अशेंच एक पवित्र, पुण्यमय श्रद्धास्थान म्हटल्यार पेडणे तालुक्यांतलें तुये गांवचें श्री भगवती देवस्थान.
गोंयांत जीं व्हड देवस्थानां आसात, तातूंत तुयें गांवचें श्री भगवती देवस्थान हें एक व्हड देवस्थान जावन आसा. श्री भगवती माता म्हटल्यार महिषासुरमर्दिनी, सौम्यरुपी सांतेरी, शांतादुर्गा, शिवरायांची देवी भवानी, वीर सुभाषांची दुर्गामाई, नवसाक पावपी देवी, भक्तांच्या उल्याक पावपी देवी म्हटल्यार भगवती देवी.
गांवांत देव देवतांची खूप देवळां आसात. देवीचे उजवे वाटेन श्री सांतेरी, मुखार श्री महादेव, तशेंच श्री भुमिपुरुस अशीं देवळां आसात. देवीचे भक्तगण गोंयच्या खाची कोनश्यांनी, विदेशांत विखुरल्यात. मात, दरवर्सा जात्रे निमतान येतात. तुयां दरवर्सा 30 परस चड ल्हान- व्हड उत्सव साजरे करतात. तुयां 800 वर्सा पयलीं भगवती देवीची स्थापना जाली. सांतेरी देवळाच्या मुखार श्री भगवती देवीची तळी आसा. श्री देवी भगवतीक गोबरेची आग ह्या नावान उलो मारतात. गांवच्या लोकांची श्री भगवती देवीचेर खूप श्रद्धा आसा. कसलेंय बरें काम करपाचें आसत जाल्यार श्री देवी भगवतीचो कौल घेतले बगर आशिर्वाद घेतले शिवाय करनात.
तुयेंची श्री भगवती देवी आनी पार्सेची श्री भगवती देवी ह्यो सख्ख्यो भयणी एकदा कमळ काडपाक पांठ्यार गेली. तेन्ना पार्सेची श्री भगवती देवी तिच्या आसनाचेर येवन बसली, अशी आख्यायिका आसा.
श्री भगवती देवीचो वर्सुकी जत्रोत्सव सोमारा 28 नोव्हेंबराक जाता. ह्या निमतान सकाळी हवनयुक्त नवचंडी, नैवेद्य, आरती, तीर्थ प्रसाद, रातीं कडे देवीची पालखेंतल्यान मिरवणूक, फोगाची आतषबाजी, पावणी, उपरांत दशावतारी नाटकान उत्सवाची सांगता जातली.
– प्रा. सुशांत तुयेंकार
नावेली – मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
