भांगरभूंय | प्रतिनिधी
भावंडांनो,
हांव जाणा, तुमी सगळीं जाणां अभ्यासांत गुंथल्यांत. तरी पूण मात्सो विसव घेतला म्हूण तुमच्या मनाची रिजवण करपा खातीर हांवें उलो मारला हां
आयकात, जीं भुरगीं मन लावन अभ्यास करतात तांकां तांच्या कश्टांचें फळ मेळटलेंच. तांच्या गिन्यानांतय भर पडटली, खोशी वाडीक लागतली हातूंत दुबाव ना. म्हाका त्या भुरग्यांचो सदांच अभिमान. तांची लक्तुबाय दिसता. मात भावंडांनो, भंय दिसता तो त्या भुरग्यांचो भंय न्हय पूण हुस्को जाता. तुमी पळयतातूच न्हय तांकां? पळयात, अभ्यास सोडून, आपल्या आवय बापायचें, घरच्यांचें सांगणें आयकनासतना तीं कशीं खेळांत रमल्यांत, मोबायलांत सामकीं भितर वतात, लॅपटॉपांत घुस्पल्यांत तांचो फुडार कितें ? ह्याच विचारान म्हाका तांचो हुस्को जाता.
भावंडांनो, तुमकां इल्लीशी काणी सांगतां घडलेली ती
एक भुरगो, वैजकीची परिक्षा दिता. पूण तुमचेभशेन न्हय. तो पर्यवेक्षकांक लांच दिता आनी परिक्षेवेळार कॉपी मारता. अशें करून तो निमणें, दोतोरकी पास जाता. वशिल्याचेर म्हळ्यार लांच दिवनूच तो एका व्हडल्या हॉस्पिटलांत नोकरेक लागता. काम करतां करतां अशाच एका दिसा.
एका घरांत एके ल्हान चलयेची आवय सौम्य झटको येवन पडटा. नाकांतल्यान रगत व्हांवता. तिचो घरकार तिका व्हडल्या हॉस्पिटलांत हाडटा. ते सुवातेर ते अस्तुरेचें ऑपरेशन करपाची जापसालदारकी त्या तरणाट्या दोतोराचेर येता. तो ती सांबाळपाचो यत्न करता. पुणून त्या यत्नांत पुराय अणभव नाशिल्ल्यान ते अस्तुरेक मरण येता. तिच्या मरणाची खबर दिवपाक तो भायर येता. त्या वेळार अस्तुरेच्या घोवाची आनी ताची नदर एक जाता. तो पळयत उरता. कारण, ताच्या मुखार अस्तुरेचो घरकार म्हणल्यार जाणें पयशांची लांच घेवन ताचे दोतोरकींत ताका पास केल्लो तो मनीसूच उबो आसता. दोतोर पळयता, त्या मनशाचे वेंगेंत ताचें धाकटुलें चली आवयच्या वियोगान मोठ्यामोठ्यान रडटालें.
भावंडांनो, येवजिया
त्या लांच घेतिल्ल्या मनशान कितें भोगलां आसतलें?
देखून म्हुणटां भावंडांनो. कॉपी करून परिक्षा दिवं नाकात. पालकांचो वशिलो लावन पास जावं नाकात. मात्शे कश्ट घेयात आनी गिन्यान मेळयत हुशार जायात. पास जायात
ज्या समाजांत आपणाक म्हळ्यार तुमकां राखला, पोसला, ल्हानाचो व्हड केला ताचें रीण फारीक करपाचें आसा. तें रीण बरें काम करूनच फारीक करपाचें आसता. बरें कार्य करून भोंवतणच्या समाजाक आपूण उपयोगी पडलो जाल्यारच
भावंडांनो, तुमचे जिणेचें सार्थक जातलें. तुमच्या आई बाबाचें वा घरच्यांचे कश्ट सार्थी लागतले. आनी तातूंतल्यान एक वेगळीच खोस मेळटली जी संवसारांतल्या हेर खंयचेय खोशये परस कितल्याशाच पटींनी वयल्या पांवड्याची आसतली. ती मेळोवंक तुमी यत्न करात हां ते खातीर तुमकां उपाट यश आनी बरी भलायकी आवडेंतां तुमचोच..
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.