तुफान स्पोर्ट्स क्लब वस्ताद

भांगरभूंय | प्रतिनिधी

आझाद स्पोर्ट्स क्लबाक 26 धांवड्यांनी हारोवन तुफान स्पोर्ट्स क्लबान पांचवी बेतोडें प्रीमियर लीग क्रिकेट सर्तीचें वस्तादपण जोडलें. तुफान स्पोर्ट्स क्लबान चवथे खेपे किताब जिखलो.

31 बॉलांत 6 सके आनी 1 चवक्यांचे मजतीन 50 धांवड्यो करपी गौरव गांवकाराची मॅन ऑफ दी मॅच पुरस्कारा खातीर निवड जाली.

गौरव (50) आनी दिनेश कळंगुटकार (18) धांवड्यां नेटार तुफान क्लबान निर्धारीत 10 ओव्हरींत 99 धांवड्यो केल्यो. आझाद क्लबाच्या ज्यु. गौरेश आनी साईशान दरेकी तीन विकेटी घेतल्यो.

तुफान क्लबाच्या संकेत मोरेन 4 धांवड्यांत 3 विकेटी घेवन आझाद क्लबाचो डाव 10 ओव्हरींत फकत 73 धांवड्यांचेर आडायलो. अशे तरेन ताका 26 धांवड्यांनी हार घेवची पडली. ज्यु. गौरेशान 5 चवक्यांचे मजतीन 12 बॉलांनी 21 धांवड्यो केल्यो. सर्तींत णव पंगडांनी वांटो घेतिल्लो.

इनाम भेटवण सुवाळ्याक सरपंच उमेश गावडे, संकेत मुळे, पुजेश गावडे उपस्थीत आशिल्ले.