भांगरभूंय | प्रतिनिधी
विखुरील्ल्यां पानांतलें 48 वें पान वाचप्यां मुखार उगतें करतना आमच्या भारत देशाची संसद सरस्वतींची, दोळे दिपकावपी गिन्यानाचे खणींची आसतली अशी आमचीं चिंतनां आसचीं. विचारवंतांनी संसदेची दोनींय सभाघरां भरलीं, ताणीं फुडाराचें चितलें, गिन्यानातल्यान
दुसऱ्याक शाणे केलें जाल्यार
फुडारय गिन्यानाचें भांडार दिवपी जातलो. भारताचे घटनेचे अमृतमहोत्सवी वर्सांतली लोकसभा, राज्यसभा उच्च शिक्षण घेतिल्ल्या विचारवंतांची जावपाक तुमचें आमचें एक मतय भोव मोलादीक हें लक्षांत दवरचें.
राज्यसभेर इंजिनियर सुधा मूर्ती राष्ट्रपती नियुक्त वांगडी म्हणून पावल्यो तेन्नाच लोकसभाय गिन्यान दिवपी जातली हें म्हाका होल्मलें. वर्सभर विखुरील्लीं पानां वाचप्यांक दितना तातूंतली चडांत चड नारीशक्तीक ओंपपाचे येत्न जाले. मोख एकूच गोंयच्या गिन्यानाचे खणीतली आनीक एक धूव, एक आवय, एक भयण संसदे वटेन वचपाक भायर सरची. एकदां चलूंक लागली की ती थांबपाची ना, दुबावविरयत जैता खातीर तुमचें, आमचें बळगें तिका मेळटलें.
नारीशक्तीक वंदना दीत संसदेत उंचेल्या तांकीची नारी पावतली ह्या वातावरणाची निर्मणी संसदेतल्या 33 टक्के अस्तुरी राखीवता विधेयकाचे मान्यतायेन जाल्या. दोन वर्सां तृणमूल काँग्रेस ह्या राजकी पक्षाचो वावर, अभ्यास केल्या उपरांतच माध्यमांतली बळिश्ट धूव सागरीका घोष राज्यसभेंत पावली. गोंयची उद्येगपती पल्लवी धेंपे हांकां तिकेट सॉरी उमेदवारी दिवन भाजपान नवो अध्याय सुरू केला. उद्येग आनी वेंचणुकांचें नातें कालचेंच, उद्येगपतींक राज्यसभेर सुवात मेळटाच, देसाचें अर्थकारणय तांच्याच हातांत आसता. लोकसभेर पावपाक चार पावलां चड चलचीं पडटात, पल्लवी चलपाक, उलोवपाक, बरोवपाक सक्षम आसा. लोकसभेर वचपा खातीर ताचे कडेन उलोवनच ती फुडें सरता तेन्ना देसा खातीर आपूण कितें तरी करतली ही तिची मोख. आमचे भांगरभूंये कडलें तिचें नातें आवयचें, मायभासेचें, लोकसभेर वचपा तातूंत ताचें आनी तिचेंय जैत आसा तें नारीशक्तीक नमन करतना ताणें दाखोवन दिलां.
पल्लवी ह्यो फक्त ब्रँण्ड धेंपो, ब्रँड तिंबलो न्ही तांकां आपलें अस्तित्व आसा, स्वतंत्र विचारांची ती एक अस्तुरी. धेंपो घराब्याचें नांव संवसारीक गिरेस्तांचे वळेरेंत पावोवपी उद्येगपती श्रीनिवास (बाबा) धेंपे हांच्या जैतांत पल्लवी हांचोय
वांटो आसा. नारी सशक्तीकरणाची
वाटय ताणीं उद्येगाक दाखयल्या. तांची वळख एक उत्कृश्ठ संसद म्हणून
फुडारांत जावची हे खातीर तांचे कडेन विचार पावोवप ही दक्षीण, उत्तरेंतल्या गोंयकारांची, गोंयां भायल्या मतदारांची लागणूक.
48 वें विखुरिल्लें पान वाचप्यांक दितना दुसरी स्त्रीशक्तीय वेंचणुकेच्या आंगणांनी पाविल्ली आसत. कळाव कित्याक? सर्तींत देंवपा खातीर पक्षनिश्ठ आसतनाय एकवटाचीं गणितां मांडप चललां आसतलें. एकवटय खिणांभितर घडोवप, मोडप शक्य आसा पूण तो घट उरपाचें तंत्रज्ञान शिक्षकांक तरणाट्यांनी, पुता, धुवांनी कित्याक शिकोवचें न्ही? प्रदुशण फकत स्मार्ट सिटींतल्या बांदकामान न्हय जाल्यार येरादारीचे कोयंडेन जाता ही माह्यती दिवपाचो होच वगत आसा. येरादारी रस्त्यांरच न्हय न्हंयांनीय वाडल्या, दर्यादेगोय म्हेळ्यो जाल्यात त्यो कशो? तकटे मोडून पडल्या आसतले, राखणदारय वेंचणुकेचे आदले सुटयेर गेल्यात? जापो सोदून काडपाखातीर बसकांचेर बसका जातात, दिल्ली ते गोंयमेरेनय त्यो जाल्यो तरी जाप मेळचीना. कित्याक? आदल्यांनी नवनिर्मणेचें बीं घाल्लें ना.
वेंचणूक उबाळाच्या दिसांनी जाता, उत्तर गोंयची काळंगां, आंबे दक्षिणेंत आनी दक्षिणेंतले भेंडे, तवशीं, पणस उत्तरेंतच कित्याक विदेसांतय पावोवपाक पार्कां जाल्यात.
इस्टर संडे दिसा पावस कोणागेर पडत सांगूंक जायना, गोठ्यांवयले कुवाळे काडून दवरील्लेच आसतले. आयताराचीं फेस्तां चणे, खाज्या वांगडा वड्यो, काजूबियो, शेवयो, सोलां, अळसांदे, चवळ्यो, सुके बांगडे, वेर्ल्यो, तोरां, सरबताचीं. वसुंधरेचें नवे रुप धरतरी आमकां पावसांत दाखयतली. पावसा पयलींच्या वावराक पणजे आरंभ जाला हेर शारां, गांवांनी उदक, कोयर, खळयांतल्या म्हेळाचें वेवस्थापन जाता हें तुमीय पळोवचें. ऑनलायन कागाळी पासत यंत्रणा पंचायत घरां, नगरपालिका इमारतींतल्या खासा विभागांनी जावपाक जाय.
दिव्यांस्त्रां, वज्रांस्त्रां परस सादो भेस, तोंडार हांशें आसल्यार मतदारराजा खोशी कित्याक जावचे ना? देस पावंड्यार उच्च शिक्षणातले अस्तुरेक म्हत्त्व येता, राजकारणातलें शास्त्र , शस्त्र तिका समजल्यार ती एक देस पावंड्यार
एक पावंडो चडत पंतप्रधान, राष्ट्रपती जाता.
उजो पालोवपी, पेटोवपी राजकारणांत क्रांती कित्याक घडोवंक शकतात एकवटानच. एकी हेंच बळगें हें सांगपी आसात? जिल्लो पावंड्यावेल्यान आमदार जेनिफर मोन्सेरात राजकारणात येतना विधानसभेचें दार तांकां उगतें जालें. घरकाराचें वेंचणूक वेवस्थापन सांबाळटना त्यो झुजल्यो, सांताक्रूज ना पूण ताळगांवां तांकां जैत मेळ्ळें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
