भांगरभूंय | प्रतिनिधी
खबरां संस्था
मुंबयः सेगीत तीन हारी उपरांत मुंबय इंडियन्सान वानखेडे स्टेडियमाचेर दिल्ली कॅपिटल्यांक 29 धांवड्यांनी हारोवन यंदूच्या आयपीएलांत आपल्या पयल्या जैताची नोंद केली. मुंबयन दिल्ल्या 235 धांवड्यांचें लक्ष्य ऋषभ पंताच्या दिल्ली कॅपिटल्यांक हातासपाक शक्य जालें ना. 20 ओव्हरींत 8 गडी वोगडावन ते फकत 205 धांवड्यो करपाक शकलें आनी मुंबयक सामक्या गरजेचें अशें जैत मेळ्ळें.
रोहित शर्मा (49) आनी ईशान किशन (42) हांणी मुंबयच्या जैताची बुन्याद घातली आनी टीम डेव्हिड (45) आनी रोमारियो शेफर्ड (39) हांणी नाबाद खेळी करून ताचेर जैताची गुडी लायली. पंगडांत तीन बदल करून शेफर्डाक घेतिल्ल्याचो डिव्हिडंट जैताच्या रुपांत मुंबयक मेळ्ळो. ट्रिस्टन स्टुब्स् (नाबाद71), पृथ्वी शॉ (66) आनी अभिषेक पोरल (41) हाणी दिल्लीक जैतिवंत करपा खातीर झंझावाती खेळ केलो. मात 5 आवट 195 उपरांत निमण्या दोन ओव्हरींत जैताचे दालें मुंबयच्या वटेन आयलें.
सेगीत तिन हारी उपरांत पंगडांत तीन बदल करून खेळपी मुंबय इंडियन्सान आपल्या घरच्या वानखेडे स्टेडियमाचेर आपल्या डावांत 5 आवट 234 धांवड्यो करून दिल्ली कॅपिटल्साक जैता खातीर आव्हानात्मक लक्ष्य दिलें. पंगडांत घेतिल्ल्या सूर्यकुमार यादवान निर्शेणी केली जाल्यार रामारियो शेफर्डान नाबाद 39 धांवड्यो करून आपली निवड सार्थ केली. मोहम्मद नबीक बॅटिंग करपाची संद मेळ्ळी ना.
मुंबय इंडियन्सा खातीर आयताराची मॅच सामकी म्हत्वाची आशिल्ली. तीन हारी उपरांत तांकां जैताची आशिल्ली गरज मतींत दवोरून रोहित शर्मा आनी इशान किशनान डावाची सुरवात सामकी बरी केली. पंगडाच्यो 80 धांवड्यो जाल्ल्यो तेन्ना अक्षर पटेलान रोहिताक क्लीन बोल्ड करून ही जोडी फोडली. 27 बॉलांत 6 चौके आनी 3 सक्यांनी झंजावाती 49 धांवड्यो करून रोहित पॅव्हेलियनांत आयलो. अर्ध शेंकडो करपाक शकलो ना तरी तांणे पंगडाच्या डावाचें मुळावण घातलें. सूर्यकुमार यादवान शून्याचेर कॅच दिली आनी दुखापतींतल्यान तो अजून बरो जाल्लो ना हें दिसून आयलें. कॅप्टन हार्दिक पंड्या वांगडा पंगडाचो शेकडो बोर्डार लावंन इशान किशन अक्षराक ताच्याच बॉलार तांच्या हातांत कॅच दिवंन आवट जालो. ताणे 4 चौके आनी 2 सक्यांनी 23 बॉलांत 42 धांवड्यो केल्यो. तिलक वर्मा (6) आवट जातगीर हार्दिक आनी टीम डेव्हिडान बॅटिंगेचीं सूत्रां आपल्या हातांत घेतलीं आनी पंगडाक दोनशेच्या टप्प्यांत हाडलें. ही पांचवी जोडी नोर्टिजान फोडली. हार्दिकान 33 धांवड्यो केल्यो. बाकीच्यो ओव्हरी डेव्हिड आनी रामारियो शेफर्डान खेळून 20 ओव्हरींत 5 आवट 234 धांवड्याचो टप्पो पंगडाक मेळोवन दिलो. 4 सके आनी 2 चौक्यांनी डेव्हिडान 21 बॉलांत नाबाद 45 तशेंच 4 सके आनी 3 चौक्यांनी 10 बॉलांत शेफर्डान 39 धांवड्यांचो पावस घातलो. दिल्लीच्या अक्षर पटेल आनी नोर्टिजान दरेकी दोन विकेटी घेतल्यो.
पृथ्वी शॉ, स्टुब्साचे अर्द शेंकडे
पृथ्वी शॉ आनी डेव्हिड वॉर्नरान दिल्ली कॅपिटल्साच्या डावाची सुरवात केली. पंगडाच्यो 21 धांवड्यो जाल्ल्यो तेन्ना वॉर्नर (10) कॅच आवट जालो. मात पृथ्वी शॉ आनी अभिषेक पोरल हांणी आक्रमक खेळ करून दुसरे विकेटी खातीर 88 धांवड्यांची भागिदारी करून पंगडाक जैताचे दिकेन व्हरपाक सुरवात केली. मात 110 धांवड्यो जाल्यो तेन्ना पृथ्वीक बुमराहान बोल्ड केलो. ताणे 8 चौके आनी 3 सक्यांनी 40 बॉलांत 66 धांवड्यो केल्यो. 144 धांवड्याचेर अभिषेकाक बुमराहान कॅच आवट केलें. ह्या उपरांत एके वटेन दिल्लीच्यो विकेटी पडत गेल्यो. 25 बॉलांत 7 सके आनी 3 चौक्यांनी ट्रिस्टान स्टुब्सान 71 धांवड्यो करून मॅच पळोवपाक आयिल्ल्यांची बरी मनरिजवण केली मात हेर खेळगड्यांचो वांगोड मेळपाक शकनाशिल्ल्यान पंगडाची हार तो वाटावपाक शकलो ना. जेराल्ड कोयटिज्स हाणे 4 आनी जसप्रीत बुमराहान 2 विकेटी घेवन मुंबयच्या जैतात म्हत्वाचें योगदान दिलें. विशेय म्हणल्यार कॅप्टन हार्दिक पंड्यान बॉलींग केली ना आनी दिल्लीचे 5 बॅट्समन दोन अंकी धांवड्यो करपाक शकले नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
