भांगरभूंय | प्रतिनिधी
पणजीः हवामान खात्यान आयतारा ४ जून दिसा केरळांत पावस आयला अशें जाहीर केलां, हवामान अनुकूल आसल्यार फुडल्या दोन ते तीन दिसांनी पावस गोंयांत पावपाची शक्यताय खात्यान उक्तायल्या.
हरशीं १ जून दिसा केरळांत पावस पावता. मात अंदूं केरळांत पावसा येवपाक ३ दीस कळाव जाला. हाचे आदीं खात्यान २६ मे दिसा केरळांत पावस येवपाची शक्यताय सांगिल्ली. पूण अनुकूल हवामान नाशिल्ल्यान अंदूं पावस येवपाक कळाव जालो.
४ ते ८ जून ह्या काळांत राज्यांत वादळी वार्या सयत पावस पडपाची शक्यताय आसा. ते प्रमाण खात्यान ह्या पांच दिसां खातीर पावसाचो येलो अलर्ट जारी केला. बिरेस्तारा राज्यांतलें हवामान दमट आशिल्लें. कांय कडेन पावस पडपाची नोंद जाल्या.
राज्यांत २४ वरांत सरासरी ६ मिमी. ह्या वेळार मुरगांवांत ३३.२ मिमी आनी कानाकोणा १५.८ मिमी पावस झडला.
पावसाक लागून राज्यांतलें तापमान उणें जालां. फुडले स दीस राज्यांत चडांत चड तापमान ३३ ते ३४ अंश आनी उण्यांत उणें तापमान २५ ते २६ अंश सेल्सियस मदीं उरपाची शक्यताय आसा. अंदूं पावस सरासरी परस सकयल आसतलो असो अदमास हवामान खात्यान उक्तायला. पावसाच्या दिसांनी पॅसिफीक म्हासागरांत एल निनो हवामान यंत्रणा तयार जावपाची शक्यताय आसा. हाका लागून सरासरी ९० टक्क्यां मेरेन पावसाची शक्यताय खात्यान उक्तायल्या. फाटल्या वर्सा केरळांत पावस आठ दीस आदीं म्हळ्यार २४ मे दिसा पाविल्लो. हाचे उपरांत फकत एका दिसांत म्हळ्यार २५ मे दिसा पावस गोंयांत पाविल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
