भांगरभूंय | प्रतिनिधी
भांगरभूंय । प्रतिनिधी
फोंडेंः तिस्क- उसगांव हांगा बाजारांतल्या जंक्शना कडेन दिसपट्टी येरादारीची कोयंडी जायत आसता. ताका लागून वाहन चालकांक बरोच वेळ वाहनाचे रांकेत रावचें पडटा. वेळ खावपी व्हो प्रकार थांबोवपा खातीर हे कोयंडीचेर उपाय काडपाची मागणी थळावे लोक तशेंच वाहन चालक करतात. येरादारीचेर नियंत्रण दवोरपा खातीर ह्या जंक्शना कडेन येरादारी पुलीस ना जाल्यार होम गार्डाक दवोरपाची मागणी वाहन चालक तशेंच थळावे लोक करपाक लागल्यात.
तिस्क उसगांव हांगच्यान फोंडें, धारबांदोडें, मोलें, साखळे, वाळपय आनी हेर वाठारांनी वचपी प्रवासी बशी यो- वच करतात. कर्नाटक आनी हेर राज्यांनी वचवी प्रवासी बशी ह्या जंक्शना कडल्यान वतात. ह्या वाठारांत बसस्टॅण्ड नाशिल्ल्यान सगल्यो बशी रस्ता कुशीक उब्यो करतात. ताका लागून बाजार जंक्शना कडेन येरदारीच कोयडी जावपाचे प्रकार जातात. ताका लागून सांजे ऑफीस सुटल्या उपरांत लोकांक घरा पावपाक बरोच कळाव जाता.
बाजार जंक्शना कडेन पयली होम गार्ड आसतालो. सध्या येरादारीच कोयंडी जाता हें दिसता तरी संबदीत सरकारी यंत्रणा ताचेर उपाय येवजण करपाचें नांव काडना.
आपलीं वाहनां घेवंन बाजारांत येवपी लोकांचो आंकडो सद्या वाडत आसा. ताका लागून ह्या जंक्शना कडेन होम गार्ड वा येरादारी पुलिसांक दवोरपाची सामकी गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
