भांगरभूंय | प्रतिनिधी
फोंडें, प्रतिनिधी: तिस्क- उसगांवच्या हायमास्ट दिव्या खाला आशिल्लें चेंबर अपघातांक आमंत्रण दिता. मंगळारा सकाळीं एक गाय ह्या चेंबरांत कोसळिल्ली दिसून आयली. हांगा मनीसूय पडपाक शकता. बांदकाम खात्याच्या अभियंत्यांनी हाचे कडेन बेगीन लक्ष दिवन ह्या उक्त्या चेंबराचेर लादयो घालपाची मागणी नागरीक करतात.
चेंबरांत सोमारा रातची उसरां गाय पडली. सुमार १ मिटर खोल चेंबरांत कोसळिल्ले गायक मंगळारा सकाळीं बिगर गोंयकार कामगारांनी भायर काडली. फाटल्या कांय दिसां सावन चेंबरांत कांय लोक कोयर उडयतात, अशें थळाव्या लोकांक दिसून आयलां. चेंबरांत उडोवपी कोयरांत कितेंय सोदपा खातीर गेल्ली गाय तातूंत पडली आनी रातभय थंय आडकून उरली.
हो चेंबर रस्त्या कुशीक आशिल्ल्यान ताचो येरादारीकूय धोको निर्माण जाला. चेंबर पुरायेन उक्तो करून दवरिल्ल्यान दुचाकी हातूंत सरळ वचून अपघात जावपाची शक्यताय आसा. व्हडलो अपघात घडचे पयलीं बांदकाम खात्याच्या अभियंत्यांनी दखल घेवन चेंबराचेर लादयो घालपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
