भांगरभूंय | प्रतिनिधी
खबरां संस्था
नेल्सनः न्युझिलंडाच्या बायल पंगडान टी-20 माळेच्या तिसरे मॅचींत इंग्लंडाक 3 धांवड्यांनी हारयलें. इंग्लंडाक जैता खातीर 8 धांवड्यो जाय आशिल्ल्यो, मात अणभवी सूजू बेट्सान 4 धांवड्यो दिवंन 2 विकेटी घेवंन पंगडाक जैत मेळोव दिलें. 60 धांवड्यो करून 2 विकेटी घेवनपी सोपी डिवायन प्लेयर ऑफ दी मॅच थारलें.
न्युझिलंडान नेल्सन स्टेडियमाचेर पयलीं खेळून 3 आवट 155 धांवड्यो केल्यो. इंग्लंड पंगड 8 विकेटी वोगडावन 152 धांवड्यो करपाक शकलो. तिसरे टी-20 त जैत मेळोवनूय न्युझिलंड पांच मॅचीचें हे माळेंत 1-2 अशें फाटीं आसा. चवथी मॅच 27 मार्चाक जातली.
न्युझिलंडान टॉस जिखून पयलीं खेळपाचो निर्णय घेतलो. सूजी बेट्सान सावकाश खेळपाक सुरवात केली. ताच्या वांगोडच्या बर्नाडीन बेजिनहॉटान फास्ट धांवड्यो केल्यो. सातवे ओव्हरींत बेट्स 14 धांवड्यो करून आवट जालें. बर्नाडीनान 27 बॉलांत 34 धांवड्यो करून आपली विकेट दिली. 2 आवट 55 उपरांत कॅप्टन सोफी डिवायन आनी अमिलिया कॅरान अर्द शेंकड्याची भागिदारी करून पंगडाक 100 धांवड्यांचेर व्हेलें. डिववायन मॅचीच्या निमणे ओव्हरींत 60 धांवड्यो करून आवट जालें. ताणे आनी अमिलियान 99 धांवड्यांची भागिदारी केली. अमिलियान 44 धांवड्यो करून नाबार रावलें. इंग्लंडाच्या डॅनिले गिबसनान 2 विकेटी घेतल्यो. साहाह ग्लेनाक एक विकेट मेळ्ळी.
जैता खातीर 156 धांवड्यांचो फाटलाव करतना इंग्लंडाक दुसरेच ओव्हरीत धपको बसलो. सोफिया डंकली शून्याचेर रनआवट जालें. टॅमी ब्युमोंटान उपरातं माया बावचरा वांगडा 92 धावंड्यांची भागिदारी करून पंगडाक बळीश्ट स्थितींत हाडलें. ब्युमोंट 37 धांवड्यो करून आवट जालें. माया बावचर 71 धांवड्यो करून 16वे ओव्हरींत आवट जालें. ताका डिवायनान कॅच आवट केलें. जैताच्या लागीं पावल्ले कडेन आसतना कॅप्टन हिथर नायक (10), एमी जोन्स (6)ल बेस हीथ (3), होली आम्रिटेग (1) आनी चार्ली डीन (1) आवट जाली. 25 धांवड्यांन इंग्लंडाच्यो 5 विकेटी पडल्यो. निमणे ओव्हरीत जैता खातीर तांका 8 धांवड्यो जाय आशिल्ल्यो. मात सूजी बेट्सान आपले हे ओव्हरींत फकत 4 धांवड्यो दिल्यो आनी इंग्लंडाक 3 धांवड्यांनी हार खावची पडली. सोफी डिवायन आनी सूजीन दरेकी दोन विकेटी घेतल्यो.
इंग्लंडान पयली मॅच 27 आनी दुसरी मॅच 15 धांवड्यांनी जिखल्ली. तिसरे मॅचींत न्युझिलंडान जैत मेळयलें. चवथी मॅच 27 मार्चाक वेलिंग्टनान जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
