भांगरभूंय | प्रतिनिधी
केरी- सत्तरीः साहित्य मंथन सत्तरी संस्थेन श्री सिद्धेश्वर पंगड सालेली हांच्या जोडपालवान आयोजीत केल्ल्या तिसऱ्या गोंय राज्य पांवड्या वयल्या ग्रामीण संमेलनाचें उक्तावण 3 डिसेंबराक सांजेच्या 4 वरांचेर जातलें. संमेलनाचे अध्यक्ष म्हूण ज्येश्ठ पत्रकार, प्रिडंट मिडियाचे आनी सुनापरान्त दैनिकाचे आदले संपादक संदेश प्रभुदेसाय हांची निवड जाल्या.
उद्घाटक म्हूण महाराष्ट्राचे नामनेचे लोकशाहीर आनी साहित्यीक संभाजी भगत हाजीर रावतले. येवकार अध्यक्ष म्हूण रघुनाथ गांवकार, जाल्यार कार्याध्यक्ष म्हूण गोपानाथ गांवस हाजीर रावतले.
दोन दिसांच्या संमेलनाच्या उक्तावण सत्रांत उद्घाटक संभाजी भगत (मुंबय) आनी संदेश प्रभुदेसाय हांचे विचार आयकुपाक मेळटले. ह्या वेळार कार्याध्यक्ष गोपीनाथ गांवस (लोककलाकार), येवकार अध्यक्ष रघुनाथ गांवकार (लोककलाकार) आनी खाशेली आमंत्रीत रेश्मा गांवकार (थळावी पंच) हाजीर आसतली. उक्तावण सत्राचें सुत्रसंचालन संजय सालेलकार करतले.
दुसरें सत्र सांजेच्या 6.30 वरांचेर सुरू जातलें. ‘मनीस वाचुया’ ह्या विशया वयल्या सत्रांत ग्रामीण मनीस अभ्यासपाक मेळटलो. तातूंत रघुनाथ नायक उर्फ बाळा, काशनाथ नायक, सातू गांवकार, गोपीनाथ गांवस, पार्वती गांवस, सारिका गांवस, बोमडो गांवकार, तुळशीदास गांवकार वांटो घेतले.
तिसरें सत्र रातच्या 9.30 वरांचेर सुरू जातलें. तातूंत लग्नगितां (पणसुली लोकगीत पंगड, मोर्लें), कळशी नाच (सालेली पंगड), देखणी नाच (महिला मंडळ पंगड, सालेली), रणमाले (श्री सिद्धेश्वर पंगड, सालेली) सादर जातले.
4 डिसेंबराक चवथ्या सत्रांत सकाळीं 6.30 ते 7.30 वरां मेरेन गांव भोंवडी, पांचव्या सत्रांत 9 वरांचेर कविसंमेलन जातलें. साहित्य अकादमी पुरस्कार फावो जाल्ले संजीव वेरेंकार कविसंमेलनाचें अध्यक्ष आसतले. पोब्र फर्नांडीस, सारिका नायक, चंद्रशेखर गांवस, आकाश गांवकार, संध्या गांवकार, अविनाश कुंकळकार, महादेव गांवकार, गौरांग नायक, शोभा फुलकार, गौतम गावडे, अपर्णा गारुडी, काशिनाथ नायक, अविनाश नायक, अश्वेता देसाय, रुसी परब, ज्ञानेश मोघे हे कवी कवयत्री वांटो घेतले.
सवे सत्र 10.35 वरांचेर सुरू जातलें. तातूंत अध्यक्ष प्रा. भुषण भावे (ग्रामीण लोक, जिवीत स्वरूप, आव्हानां आनी उपाय), अद्वैत साळगांवकार (ग्रामीण जिवीत आनी साहित्य), डॉ. डेनीस वाझ (परंपरीक लोकवेवसाय आनी लोकभास), देविदास गांवकार (ग्रामीण अर्थवेवस्था) वांटो घेतले.
‘कातकरी समाज समजून घेतना’ ह्या विशयाचेर सातवें सत्र दनपारां 12 वरांचेर सुरू जातलें. तातूंत दशरथ मोरजकार विचार मांडटले. जेवणा उपरांत दनपारां 3 वरांचेर समारोप सत्र जातलें.
समारोप सत्राक मुखेल सोयरे म्हूण कोंकणी भाश मंडळाची अध्यक्ष अन्वेशा सिंगबाळ, समारोप सत्राचे अध्यक्ष म्हूण शिक्षणतज्ञ नारायण देसाय, संमेलनाचे अध्यक्ष आनी कार्याध्यक्ष हाजीर रावतले. संमेलनांत प्रतिनिधी म्हूण वांटो घेवचे खातीर साहित्य मंथन सत्तरी सचीव राजू बर्वे (9404925849) वा उपाध्यक्ष नमन धावस्कार (9765031800) हांचे कडेन संपर्क करचो, अशें आयोजकांनी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
