भांगरभूंय | प्रतिनिधी
चेन्नय, खबरां संस्था ः मल्याळम इंडस्ट्री प्रमाण तामिळ आनी तेलगू फिल्म इंडस्ट्रीय बायलां खातीर सुरक्षीत नात. फिल्माच्या शुटींग वेळार जेन्ना अभिनेत्री व्हॅनिटी व्हॅनांत कपडे बदलपाक वता तेन्ना तांचे नग्न व्हिडियो गुप्त कॅमेऱ्यांनी रेकॉर्ड केल्ले, असो गंभीर आरोप अभिनेत्री राधिका सरतकुमार हांणी केला.
‘आशिया नेटा’क दिल्ले मुलाखतींत अभिनेत्रीन म्हणलें, केरळांत सेटांचेर आसतना लोक एकठांय जमून हांसतात तें हांवें पळयलें. थंयच्यान वतना म्हाका दिसलें, ते एक व्हिडियो पळयतात. हांवें एका क्रू मेंबराक आपोवन विचारलें ते कितें पळयतात. ताणें म्हाका सांगलें की व्हॅनिटी व्हॅनांत कॅमेरे आसात आनी तांचो वापर करून बायलांचे कपडे बदलतानाचे व्हिडियो रॅकोर्ड करतात. म्हाका सांगलें की तुमी फकत कलाकारांचें नांव टायप करात आनी तुमकां तांचो कपडे बदलतनाचो व्हिडियो मेळटलो.
हांवें ते व्हिडियो पळयले….
हे विशीं म्हजो पंगडा कडेन वाद जालो अशें राधिका हांणी सांगलें. तिणें म्हणलें, ‘व्हॅनांत बायलांनी कपडे बदलपाचे व्हिडियो हांवें पळयल्ले. हाचे उपरांत हांवें पंगडाक सांगलें की हें योग्य न्हय. म्हजे गाडयेंत कॅमेरो मेळ्ळो जाल्यार जोत्यान तोंड फोडटलें, अशें हांवें तांकां सांगलें. म्हाका राग आयिल्लो. सुरक्षीत रावपाक जाय असो आग्रो हांवें धरलो. हे घडणुके उपरांत हांवें ही गजाल म्हज्या वांगडी कलाकारांक सांगली. व्हॅनिटी व्हॅनांत वचपाक भंय दिसतालो. ही आमची खाजगी सुवात, जंय आमी कपडे बदलतात, विसव घेतात वा जेवतात. हे घडणुकेचो म्हजेर इतलो वायट परिणाम जालो की उपरांत हांव हॉटेलांत वचून कपडे बदलतालीं.
आमच्या सुरक्षेची जापसालदारकी आमीच घेवचीः राधिका
मलयाळम उद्देगांतल्या बेकायदेशीर लिंगीक त्रासाचो प्रकार उक्ताडार हाडपी हेमा समितीच्या अहवालाचेरय राधिका हांणी आपले विचार मांडले. तिणें म्हणलें, ‘न्या. हेमा समितीचो अहवाल जाहीर करपाक इतलो कळाव कित्याक जालो असो प्रस्न म्हाका पडटालो? हांव 46 वर्सां इंडस्ट्रीत आसा. अर्थांत लोकांनी म्हजेरुय अन्याय करपाचो यत्न केला. पूण आतां आमकां आमचे सुरक्षेची जापसालदारकी स्वता घेवची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
