भांगरभूंय | प्रतिनिधी
आप, गोवा फॉरवर्डा कडल्यान कामाच्या ऑडिटाची मागणी
पावसाक लागून बांदकाम कोसळ्ळें: स्मार्ट सिटी
पणजी : स्मार्ट सिटी कामाच्या दर्जा विशीं नागरीक तशेंच विरोधकां कडल्यान खर टिका सुरू आसतनाच सांत इनेज – ताड माड वाठारांतलें बांदकाम कोसाळपाची घडणूक घडली. हे घडणुके उपरांत आम आदमी पक्ष तशेंच गोवा फॉरवर्डान कामाच्या ऑडिटाची मागणी केल्या. कामाचो दर्जो योग्य आसून पावसाक लागून बांदकाम कोसळ्ळें अशें स्पश्टीकरण स्मार्ट सिटीच्या अधिकाऱ्यांनी दिलें.
ताड माड – सांत इनेज वाठारांत स्मार्ट सिटी रस्त्याचें काम सुरू आशिल्ल्यान येरादारी खातीर रस्तो बंद आसा. सोमारा सकाळीं सकयली माती कोसळून वयलें बांदकाम कोसळ्ळें. आम आदमी पक्षाचे मुखेली अॅड. अमीत पालेकार हांणी कोसळिल्ल्या बांदकामाची पळोवणी केली.
बांदकाम कोसळिल्ल्यान विरोधकांनी कामाच्या दर्जा विशीं दुबाव घेवन कंत्राटदारा आड गुन्याव नोंद करपाची मागणी केली.
स्मार्ट सिटीच्या कामाचो दर्जो खूब बाबत आसा. कंत्राटदारा आड गुन्यांव नोंद करचो अशी मागणी गोवा फॉरवर्डाचे अध्यक्ष विजय सरदेसाय हांणी केली. गुन्यांव नोंद करपाची मागणी मुखेल सचिवांक पत्र बरोवन तांणी केल्या. ताड माड हांगा बांदकाम कोसळपाची ही पयलींच घडणूक न्हय. हाचे पयलीं रस्ते नेमपाचे प्रकार जाल्यात. पुराय कामाच्या दर्जाचें ऑडीट जावपाची गरज आसा. ऑडिटा सयत कंत्राटदारा आड गुन्यांव नोंद करपाची मागणी गोवा फॉरवर्डान केल्या.
सरकारान स्मार्ट सिटीच्या कामाचें ऑडीट केलें ना, जाल्यार खंडपिठांत याचिका घालपाची शिटकावणी आपाचे अॅड. अमीत पालेकार हांणी दिल्या.
उत्पल पर्रीकार हांणी लेगीत कोसळिल्ल्या बांदकामाची पळोवणी केली. कामाच्या दर्जा विशीं दुबाव घेवपा सारखी स्थिती आसा. कामाच्या दर्जाचेर सरकार तशेंच म्हापालिकेन लक्ष दवरपाची मागणी उत्पल पर्रीकार हांणी केली.
पावसाक लागून बांदकाम कोसळ्ळें
मजगतीं, स्मार्ट सिटीच्या अधिकाऱ्यांनी कोसळिल्ल्या बांदकामाची पळोवणी केली. पावस खूब पडिल्ल्यान माती भुसभुशीत जाली आनी ती कोसळ्ळी. हाका लागून मातये वेलें बांदकाम कोसळ्ळें. कामाचो दर्जो योग्य आसा. पावसाक लागून बांदकाम कोसळ्ळें. माती काडपाचें काम सुरू आसा. रस्त्याचें काम नियोजना प्रमाण जातलें अशी म्हायती अधिकाऱ्यांनी दिली.
देवूळ, वडाची जतनाय घेतले: म्हापौर
वडाचें झाड तशेंच देवळाक कसलीच आडखळ करिनासतना रस्त्याचें काम करपाक स्मार्ट सिटीक सांगलां अशें म्हापौर रोहीत मोंसेरात हांणी सांगलें. कोसळिल्ल्या बांदकामाची तांणी पळोवणी केली. कामाचो दर्जो योग्य आशिल्ल्याचे तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
