भांगरभूंय | प्रतिनिधी
फोंडें, प्रतिनिधी ः उसगांवांतल्या फिनोलेक्स कंपनींत तांब्याचे केबल घेवन आयिल्ल्या ट्रकांतल्यान सुमार 20 लाखांचें तांब्याचे केबल फारावन पळून गेल्लो ट्रक ड्रायव्हर अशोक (महाराष्ट्र) हांचे आड फोंडें पुलिशेंत गुन्यांव नोंद केला. चिपळूण ते लांजा मेरेनच्या मार्गाचेर तांब्याचे केबल फारायल्याचो दुबाव आसा.
मेळिल्ले म्हायती प्रमाण एमएच- 09- एफएल – 7547 क्रमांकाच्या ट्रकांतल्यान उसगांवच्या फिनोलेक्स कंपनींक 26 टन तांब्याचे केबल हाडटाले. पूण बुधवारा ट्रक उसगांव पावलो तेन्ना ट्रकांत अडेज टन तांब्याचे केबल नाशिल्ल्याचें दिसून आयलें. तशेंच ट्रक ड्रायव्हरुय फरारी जाल्ल्यान सुरेश कुमार शर्मा हांणी ह्या प्रकरणा विशीं ट्रक ड्रायव्हर अशोक हांचे आड रीतसर कागाळ दाखल केली. बुधवारा रातीं फोंडें पुलिसांनी फरारी जाल्ल्या ट्रक ड्रायव्हरा आड गुन्यांव नोंद केलो. निरिक्षक तुषार लोटलीकार ह्या प्रकरणाचो फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
