भांगरभूंय | प्रतिनिधी
मडगांव, प्रतिनिधी ः मूळ गोंयकार, पूण अमेरिकेंत रावपी सोहित वेर्णेंकार हांच्या तळावले- नावेलेंतल्या घरांतल्यान 24 मार्चाक सुमार 45 लाखांचें भांगर चोरीक गेले. मडगांव पुलिसांनी थंय वचून पळोवणी केली आनी चवकशी सुरू केली. पूण एफआयआर नोंद करुंक नाशिल्लो. सोहित हांणी सोशल मिडियाचेर आपलें दुख उक्तायले उपरांत निमाणे मडगांव पुलिसांनी गुन्यांव नोंद केलो.
जेस्सिकाच्या कॅन्सराच्या उपचारा खातीर हें कुटुंब गोंयांत आयलां. 24 मार्चाक सोहित आनी जेसिका सयत सगळें कुटुंब जेसिकाच्या उपचारा खातीर घरांतल्यान भायर सरलें तेन्ना दनपारां सुमार 12 ते सांजवेळा 5 वरां मजगतीं आलमारींतलें भांगराचे अलंकार चोरून व्हेले. घराच्या फाटल्या जनेलाची कंवची फोडून चोर जनेला उगडून घरांत भितर सरले आनी चोरी केली.
मडगांव पुलिसांनी घडणूक सुवातेर वचून पळोवणी केली. सुण्यांच्या पंगडां सयत तज्ञांनी तपासणी केली. हेर चोरी परस ही चोरी वेगळी अशें पुलिसांक दिसली म्हणून तांणी चवकशी मेरेन गुन्यांव नोंद करूंक ना. पुलिसां कडल्यान चोरयेची चवकशी करचे परस आमकांच प्रस्न विचारतात. चोरी जावन इतलो तेंप जाले उपरांत लेगीत पुलीस गुन्यांव नोंद करीनात अशें दुख कागाळदार सोहितान शुक्रारा सोशल मिडियाचेर उक्तायलें. हाचे उपरांत मडगांव पुलिसांनी ताकतिकेन घरफोडी आनी चोरीचो गुन्यांव नोंद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
