भांगरभूंय | प्रतिनिधी
विद्वाट्यांनी बांयचें खदूळ उदक सोडिल्लें टांकयेंत
अधिकाऱ्यांनी पळोवणी करतकच आयलें उक्तडार
सांगें: फाटल्या आठ दिसां सावन सांगें मतदारसंघांतल्या तळसाय हांगासरल्या पियेवपाच्या उदका विशीं गाजत आशिल्लो विशय काल उक्तो जालो. सांगें मतदारसंघांतल्या धरण पिडेस्त म्हणपी तळसाय गांवच्या लोकांनी बांयचें खदूळ उदक पीत आशिल्ल्याचें सोशल मिडियाच्या माध्यमांतल्यान सांगिल्लें. पूण थंयची खरी परिस्थिती पळयत जाल्यार थंयचे लोक खदूळ पियेनात. जर तांणी पियेल्लें जाल्यार ते दुयेंत कित्याक पडले नात असो प्रस्न उपस्थीत जालो.
तळसाय हांगा दोन बांयो आसात. त्या बांयचें उदक वापरात घेनात. उदकाचो विशय भेडसायत आशिल्ल्यान थळावे आमदार आनी मंत्री सुभाष फळदेसाय हांणी बोरवेल बांदून दिल्ली. त्या बोरवेला वरवीं तांकां पायपलायन जोडून तें उदक टांकयेंत सोडिल्लें. तेंच शुद्ध उदक लोक पियेतात. पूण गांवांतल्या कांय विद्वाट्यांनी बांयचें खदूळ उदक ते टांकयेंत सोडलें आनी उदक पियेवपा लायकीचें ना असो प्रचार केलो.
त्याच विशया वेल्यान काल (शुक्रारा) उपजिल्होधिकारी मिलिंद्र वेळीप, पेयजल खात्याचे अभियंते देविदास बोरकार, भलायकी खात्याचे वासुदेव पांडु नायक, दिनेश भंडारी, सरपंच चंदन उनंदकार आनी हेर अधिकाऱ्यांनी पळोवणी केली तेन्ना पायपलायनी वरवीं टांकयेंत बांयचें खदूळ सोडिल्ल्याचें नदरेक आयलें. रोखडीच उपजिल्होधिकाऱ्यांनी पायपलायन काडून उडोवपाचो आदेश दिले बराबर कनेक्शन तोडलें.
बांयचें कनेक्शन काडून तांणी हे टांकयेक जोडिल्लें. म्हणल्यार बोरवेलचें जें नितळ उदक आसा तातूंतच खंय तरी ह्या बांयचें पियेवपा योग्य नाशिल्लें उदक मिक्स जातालें. बोरवेलचें नितळ उदकाचे सॅम्पल आनी बांयच्या उदकाचे सॅम्पल तपासणी खातीर धाडून दिल्यात. बेकायदो रितीन नितळ उदकांत पायपलायनी वरवीं खदूळ उदक सोडपी मनशाक सोदून ताचेर खर कारवाय करची अशी मागणी जायत आसा.
पंप गायब
झाडांक उदक दिवपा खातीर वापरतात तो पंप पळोवणी करपाक येवपाचे आसात हें समजले उपरांत पंप गायब केलो. पंपा खातीर लागपी वीज बेकायदो आशिल्ल्याचीय खबर आसा.
–
मंत्री फळदेसाय हांचें नांव पेड्डेर करपा खातीर षडयंत्र
उदक खदूळ आशिल्ल्याचें प्रसार माध्यमांतल्यान आयकूंक येतालें. पूण उदक खदूळ नासून मंत्री सुभाष फळदेसाय हांचे नांव पेड्डेर करपा खातीर कांय विद्वाट्यांनी बांयचें खदूळ उदक टांकयेंत सोडलें. पूण काल पळोवणी करतकच पायपलायन काडून उडयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
